Treng mange fleire tilsette neste åra

Ved Aas Mek. Verksted i Vestnes har dei i løpet av kort tid fått inn oppdrag med å bygge fire nye brønnbåtar.

Det er mildt sagt ikkje dagleg kost etter at marknaden for å bygge slike båtar bremsa heilt opp etter lakseskatten kom på bordet hausten 2022.

Produksjonssjef og medeigar Frode Johan Aas meiner det er all grunn til å sjå lysare på situasjonen.

– Vi ser at det har losna i marknaden og det er solid interesse for nybygg om dagen. Eg trur nok ting blir lettare framover, seier han til Nett No.

Førre veke blei det kjent at Sølvtrans tingar to nye spesialbåtar for frakt av smolt. Denne veka kom nyheita om at Njord Aquashipping vil ha to nye brønnbåtar.

Kjem frå historisk gode år
No er det feriestille på Vestnes-verftet, men med dei nye oppdraga er det etter kvart utsikter til ei kraftig auke i arbeidsstokken som i dag teller nærare 80 faste tilsette.

– Vi har teke bemanninga litt ned i løpet av det siste året, men har samtidig hatt godt å gjere, mellom anna med ombygging for Sølvtrans, seier Frode Johan Aas.

Både 2022 og 2021 var svært gode år for det familieeigde verftet. Rekneskapen for 2023 er ikkje offentleg enno.

Når toppen i 2026/2027
Med ei gradvis opptrapping i arbeidsstokken dei neste åra, reknar produksjonssjefen med at verftet kan kome opp i ei sysselsetting på drygt 250 faste og innleigde arbeidarar.

Det vil i tilfelle vere på nivå med rekordnivået frå nokre år tilbake.

– Vi vil trenge fleire folk når vi startar på Sølvtrans-kontraktane i 2026, og endå fleire når vi begynner med oppdraga for Njord året etter, fortel han.

Vil bli kamp om nye tilsette
På Aas Mek. Verksted vil dei ha tid på seg til å planlegge for dei komande toppane, men dei opplever allereie at det er kamp om arbeidarane ettersom fleire verft har fylt ordrebøkene.

I løpet av det siste halvåret har det kome ei rekke oppdrag på bygging av nye skip både til vindkraftmarknaden, offshore, ferjer og ulike spesialskip.

– Det begynner å bli ei utfordring å skaffe nok kvalifisert arbeidskraft, seier Frode Johan Aas som situasjonen.