Kjende bedrifter til Investormatch

Seagems Group lagar smak- og ernæringstilsettingar til matvareindustrien, basert på råstoff frå sjømatindustrien.

Elisabeth Maråk Støle overtok leiarjobben etter grunnleggar Oddvar Bjørge ved årsskiftet, og kjem til Investormatch for å presentere selskapet.

Ideen bak Investormatch er å utvikle investormiljøet på Nordvestlandet og spleise investorar og bedrifter på jakt etter kapital og partnarar. Målet er å få med både etablerte bedrifter og bedrifter i startfasen.

Blant innleiarane i tillegg til Seagems-sjefen står administerande direktør Ingegjerd Eidsvik i ingeniør- og prosjekteringsselskapet Artec Aqua i Ålesund.

Hit kjem også administrerande direktør Christer Valderhaug i helsekost- og legemiddelselskapet Arctic Bioscience i Ørsta og administrerande direktør Richard Myhre i ingeniør- og industriselskapet Axtech i Molde.

Les programmet her

Dobbel dose
Investormatch er eit samarbeidsprosjekt med ÅKP, Nordea, Converto, Alliance Venture og BDO som partnarar i år, og blei første gang arrangert i 2019.

Inntil i år har Investormatch vore eit årleg arrangement. No blir det Investormatch to gangar i året - både vår og haust.

Investormatch er etterfølgjaren til "Founders lunch" eit hyppigare investor/gründer-arrangement i ÅKP-regi, i mindre skala.

Ser inn i framtida
I ein panelsamtale vil Wavefoil-sjef Bente Storehaug Dahl , Wherebysjef Øyvind Reed, investeringsfondpartnar Arne Tonning og investor Karl Kristian Sunde kome med sine vurderingar om utviklinga framover.

Investeringsdirektør Robert Næss i Nordea skal snakke om konsekvensen av geopolitiske trendar for kapitalmarknaden.