![Oddvar Bjørge Firmenich Bjørge Biomarin foto Ogne](/imager/images/1160427/Oddvar-Bjørge-Firmenich-Bjørge-Biomarin-foto-Ogne_859d8f71e51cdcc79197ecd3648d156c.webp)
Industri-comeback for Oddvar Bjørge
Seagems Norway - med Oddvar Bjørge i spissen - har gått frå null til 47 millionar inntekter på berre fire år.
Bjørge var med på å bygge opp og utvikle Firmenich Bjørge Biomarine.
Oddvar Bjørge er fødd i 1952. Han kunne vore pensjonist idag, men valde heller gründerlivet. No byggjer han opp nykomaren Seagems Norway i høgt tempo.
Begge selskapa held til på Ellingsøya og lagar smak- og ernæringstilsettingar til matvareindustrien, basert på råstoff frå sjømatindustrien.
Firmenich Bjørge Biomarin vart etablert av far til Oddvar Bjørge, og seld til det sveitsiske Firmenich-konsernet i 2002 .
Oddvar Bjørge heldt fram i leiinga også etter salet og var styreleiar inntil 2015.
Ny start
Tre år etter Bjørge sa farvel til det
tidlegare familiefirmaet var han i gang på nytt i same bransje, i
Seagems Norway, som har fabrikk berre nokre kilometer unna Firmenich
Bjørge Biomarin.
Det har gått kjapt oppover. Selskapet sysselsette i fjor 12 årsverk, og henta inn 37 millionar kroner i ny eigenkapital for å finansiere ytterlegare vekst.
Bjørge er både medgrunnleggar, største aksjonær - med 27,3 prosent av aksjane - og dagleg leiar.
Hofseth og Bjørge-familien
Ein annan sjømatinvestor frå Ellingsøya - Roger Hofseth - var allereie stor aksjonær før kapitalutvidinga.
Hofseth deltok også på kapitalutvidinga i fjor, og opprettheldt dermed sin eigarandelen nesten fullt ut. Hofseth-selskapet Finnvik Eiendom eig 17,15 prosent i Seagems Norway.
Styreleiar Jan Audun Dyreholt Bjørge eig 13,7 prosent i selskapet, styremedlem Jan Bjørge eig 10,9 prosent.
Til saman eig dei fire største aksjonærane 69,1 prosent av selskapet.
Grashoppepengar
Blant deltakarane i emisjon er selskapet Metapod. Det var eit selskap som skulle utvikle fiskefôr basert på oppdretta grashopper, grunnlagt av studentar på NTNU i Ålesund.
Selskapet fekk også lokale investorar med på laget, Toyota-forhandlar Espen Digernes i Ålesund og Molde-investor Sveinung Henden.
Oppdrettsnæringa var interessert, og Metapod fekk ein avtale med oppdrettsamarbeidet Salmon Group. Men selskapet lukkast ikkje i å få i gang produksjonen, og Salmon Group avslutta samarbeidet.
Heldigvis for Henden og Digernes var mesteparten av pengane dei skaut inn i Metapod framleis i selskapet då grashoppe-satsinga vart avblåst.
Dei kjøpte ut studentane, og investerte i Seagems Norway i staden, der Metapod no er eigar av 3,7 prosent av aksjane.
I tillegg er selskap Henden og Henden Fiskeindustri med på eigarsida etter kapitalutvidinga.
NETT NO har ikkje lukkast med å få ein kommentar frå Oddvar Bjørge.
Seagems Norway as | ||
Tal i mill. kroner | 2021 | 2020 |
Driftsinntekt | 47,7 | 31,8 |
Driftsresultat | 4,1 | 2,3 |
Resultat før skatt | 3,2 | 1,4 |
Firmenich Bjørge Biomarin as | ||
Tal i mill. kroner | 2021 | 2020 |
Driftsinntekt | 127,6 | 140,5 |
Driftsresultat | 14,0 | 22,5 |
Resultat før skatt | 6,1 | 19,0 |
Publisert: 01.07.2022 10:43
Sist oppdatert: 01.07.2022 12:30