Koronabrems for Sparebanken Møre

Banken har eit svekka resultat i 1. kvartal i år samanlikna med 1. kvartal i fjor.
Sjølv om rentenettoen har auka, er dei samla inntektene reduserte frå 381 til 354 millionar kroner.

Større tap

Dette skuldast reduksjon av andre inntekter, spesielt som følgje av verdiendring på obligasjons- og fastrenteporteføljene.
I kvartalet har banken eit kurstap på 42 millionar kroner på obligasjonsportefølgjen.
Kostnadene vart også 10 millionar kroner høgare enn i 1. kvartal i fjor, og banken har 36 millionar kroner i tap på utlån og garantiar.
Banken merkar auka ein auke i misleghald av avtalar.

- Eit spesielt kvartal

Resultatet før skatt enda på 191 millionar (211 millionar) og resultat etter skatt på 117 millionar (162 millionar).
– Koronasituasjonen har gjort dette til eit spesielt kvartal. Nærheita til kundene våre har aldri vore viktigare, og vi har fullt fokus på å gjere alt vi kan for å støtte både kundar og lokalsamfunn med god rådgivning og konkrete tiltak.
- Trass i noko nedgang i resultatet, stadfestar tala for 1. kvartal at banken er solid og godt rusta for den endra marknadssituasjonen, seier adm. direktør Trond Lars Nydal, i ei pressemelding.

Lite eksponert mot offshore

Banken opplever framleis utlånsvekst, og har no 44,2 milliardar kroner utlånt i personmarknaden og 21,1 milliardar til næringslivet.
Banken har lite utlånt til offshore og supply.
Også innskota aukar, og er på 22,3 milliardar kroner frå personmarknaden og 15,1 milliardar frå næringsliv.
Siste tolv månadene er utlånsveksten på 6,3 prosent, medan innskotsveksten er på 6,7 prosent.
– Det er utfordrande å forutseie konsekvensane av koronasituasjonen, men vi har ei solid portefølje og følgjer engasjementa våre tett.
- Vi forventar likevel eit auka tapsnivå totalt sett for inneverande år som følgje av koronasituasjonen, seier Nydal, i pressemeldinga.

Vil bidra

Han opplyser at banken i løpet av kvartalet har iverksett ei rekkje tiltak for å hjelpe både personkundar, næringsliv og lokalsamfunn som har fått merke dei krevjande tidene, blant anna med avdragsutsetjing, rentejustering og rådgiving.
– Som regionens største bank har vi ei viktig rolle i denne situasjonen, og dei tilsette har lagt ned ein betydeleg innsats for å bidra, seier Nydal.
Banken forventar at produksjon og etterspørsel i Møre og Romsdal samla sett bil falle i år på grunn av dei aktivitetsdempande tiltaka mot koronaviruset, samt det kraftige oljeprisfallet.

Trur på gradvis betring

Banken viser til at nedgangen i aktivitetsnivået har ført til ein sterk oppgang i permitteringar, og ved utgangen av mars utgjorde ledigheita i Møre og Romsdal 10 prosent av arbeidsstyrken.
– En vesentleg del av næringslivet vil kunne kome i gjenge etter at de strengaste smitteverntiltaka er oppheva. I så fall vil aktiviteten gradvis ta seg opp i andre halvår og gjennom 2021, seier Nydal.
Banken hadde ved utgangen av kvartalet 354 årsverk, to færre enn på same tid i fjor.