Lagar mat til sjuke og soldatar

- Vi vart tvinga til å stenge butikkane og restaurantane på grunn av det russiske angrepet på Ukraina. Men eigarane av selskapet bestemte at vi skal prøve å hjelpe sjuke, såra, andre trengande og soldatane som vernar våre liv og vår uavhengigheit.

Det skriv direktør Sergii Lysiuk i Egersund Seafood i Kyiv i ein epost til NETT NO.

Store på sjømat
Han opplyser at mange av dei tilsette arbeider døgnet rundt for å skaffe mat.

- Vi steiker brød, kjøper inn den maten som framleis finst, og leverer rundt til sjukehus og til forsvarsstyrkene.

Pelagia-eigde Egersund Seafood er storimportør av norsk sjømat til Ukraina.

Selskapet har også bygt ut eige produksjonsanlegg, og har seks butikkar og sjømatrestaurantar i Kyiv. I tillegg har selskapet ein butikk og restaurant i Lviv.

400 tilsette
Totalt hadde selskapet rundt 400 tilsette i Ukraina då krigen starta.

- Eg veit ikkje kor mange vi er i dag. Det endrar seg heile tida, skriv Lysiuk.

Han opplyser at mange andre selskap stiller opp med hjelp, både lokale selskap og andre internasjonale matvareselskap.

- I går fekk vi fem tonn med poteter.

- I dag treng vi grønsaker, skriv Lysiuk.

Han oppheld seg framleis i Kyiv saman med familien.

- Tusen takk til alle som hjelper. Det trengst.