Lovar ny kvotemelding

Den førre regjeringa brukte seks år på å lage ei kvotemelding om korleis fiskekvotane skal fordelast. Den nye regjeringa skal ikkje bruke så lang tid, seier Bjørnar Selnes Skjæran til NETT NO.

Kvotemeldinga til Solberg-regjeringa enda med lite og ingenting, etter at Solberg-regjeringa ikkje greidde å samle partia på Stortinget om eit breitt forlik som kan overleve komande regjeringsskifte.

No skal Skjæran prøve på det Solberg og hennar fiskeriministrar ikkje greidde.

Tett samarbeid
Utforminga av den nye kvotemeldinga skal skje i tett samarbeid med organisasjonane i næringa, og samle eit breitt fleirtal på Stortinget. Det er målet seier Skjæran.

Målet er også ei meir rettferdig fordeling av kvotane, fleire heileårsarbeidsplassar i kystsamfunna og utvikling av fiskeindustrien.

I tillegg skal den også gi svar på korleis dei tidsavgrensa strukturkvotane skal tilbakeførast og om dagens system skal endrast på. Ein strukturkvote er ein fiskekvote som blir overført frå ein båt til ein annan når kvotar blir samla på færre fartøy. Strukturkvoten kan berre behaldast i ei avgrensa tid. I dag blir strukturkvoten fordelt på alle båtane i same fartøygruppe når tida er ute.

Skjæran vil ikkje utdjupe kva som ligg i "ei rettferdig fordeling av kvotane", men seier han allereie har bedt fiskeriavdelinga i Nærings- og fiskeridepartementet om å utebeide ein tidsplan for ei ny kvotemelding.

Turné på Sunnmøre
Skjæran har lagt sin første tur som fiskeri- og havminister til Sunnmøre. Han starta med besøk hos Kystverket i dag tidleg, som no er blitt lagt inn under Nærings- og fiskeridepartementet.

Deretter opnar han Verftskonferansen i Ålesund, besøkjer Ulmatec på Hareid og Ulstein Verft i Ulsteinvik.