No er halve oppdragsmengda på land

Innreiing av 84 hyblar og fellesrom i det nye studenthuset Sundebygget i Ålesund utgjer halvparten av omsetnaden for Rovde Møbel & Design As.

Bygget skal opnast i haust, og vart i år ein viktig ordre for møbelbedrifta på Rovdestranda.

Bedrifta med 13 tilsette har tradisjonelt hatt skipsmarknaden som største kundegruppa, men dei siste åra har også kundar på land vorte eit større satsingsområde.

Innreiing av næringsbygg, så vel som privatbustader og hytter, fyller no ordrebøkene ut over sommaren og hausten.

(saka held fram under)

Kort leveringslinje
Ein av fordelane møbelbedrifta dreg nytte av er ei superkort leveringslinje, direkte frå fabrikk til kunde.

– Heile vegen har vi hatt ei stigning innan kjøken, garderober, vaskerom og bad, sågar innreiing av heile bustadhus. Vi lagar det på mål til kundane, som gjerne vil ha noko som ikkje andre har, fortel dagleg leiar Paul Sindre Vedeld.

Rekordomsetning i fjor
Rovde Møbel & Design omsette i fjor for 13,18 millionar kroner og enda med eit driftsresultat på 255.426 kroner.

Det var også ny omsetningsrekord med god margin for selskapet. (sjå tabell under).

Kjerneområdet til bedrifta er framleis innreiing av båtar. Spesielt har Larsnes Mek. Verkstad vist seg å vere ein trufast kunde. Det komande halvåret har verftet to brønnbåtar og to fiskebåtar i kø for innvendig møblering.

Auke i råvareprisar
Til liks med andre aktørar i bransjen, merkar også Rovde Møbel & Design den globale auken i råvareprisar som ei utfordring.

– Det verste er dei enorme prisstigningane på tre. Laminatet har ikkje hatt den store auken, men på kjerneplater er det snakk om bortimot 100 prosent prisstigning frå 2020, seier Vedeld.

Så langt har ikkje høgare innkjøps- og utsalsprisar gått ut over ordremengda innan skipsmarknaden.

– Men vi er spent på kva det utgjer i den andre marknaden, seier han.