Nytt oppdrag for Kleven

Green Yard Kleven har sikra seg nok eit oppdrag for Hurtigruten. Måndag blei det klart at verftet skal klargjere MS Roald Amundsen til ekspedisjonscruise og skipet segla ved 13-tida inn Ulsteinfjorden på veg til verftet.

Verftet i utkanten av Ulsteinvik har sikra seg fleire mindre ombyggingsoppdrag for reiarlaget det siste året.

- Vi er meget godt nøgde med å få eit nytt oppdrag av Hurtigruten Expeditions berre kort tid etter at vi har levert MS Maud og MS Otto Sverdrup, uttalar verftsdirektør Kjetil Bollestad ved Green Yard Kleven i ei pressemelding.

Verftet skal gjere større og mindre jobbar for å gjere skipet klart til nye cruise, ifølgje meldinga. Medan skipet ligg til kai, vil det vere kopla til landstraum.

MS Roald Amundsen er bygd ved Kleven og blei levert i 2019. Verftet bygde også systerskipet MS Fridtjof Nansen. Bygginga enda med økonomisk havari og påfølgjande konkurs for det dåverande verftsselskapet.