Optimisten frå Hellesylt

Prisen vert delt ut av Stiftinga Geirangerfjorden verdsarv, og vart overrekt under festmiddagen ved Grøn fjord-konferansen på Hotel Union.
Prisen skal gå til ein person eller lag i Storfjord-området som har utmerkt seg som ein optimist, og der ein spesielt ønsker å løfte fram eldsjelene.
Ole Ringdal sa at han var både stolt og rørt over å få ein slik pris.
- Eigentleg er det mot alle odds at vi har halde til i Hellesylt sidan 1938, men her skal vi vere og her skal vi utvikle oss vidare.

Hjørnesteinsbedrift

Ole Ringdal er hjørnesteinsbedrifta på Hellesylt med rundt 50 fast tilsette, og rundt 80 i haustsesongen.
Årleg vert det slakta rundt 25.000 dyr, og 17 gongar er lokala utvida.
Ole Ringdal fortalte at ved den siste utvidinga til 60 millionar kroner i 2018, vart det investert i varmevekslar, noko som førte til stoe kutt i straumrekningane.
- Vi auka med 2.000 kvadratmeter, men reduserte samstundes den månadelege straumrekninga med 110.000 kroner.

Takka dei tilsette

Han er sjølv tredje generasjon drivar av familiebedifta, og hadde ambisjonar om vidare vekst.
- For oss har det viktigaste alltid vore å trygge eksisterande arbeidsplassar og skape nye.
- Dei pengane vi har tent har gått til vidare utbygging.
Han takka dei tilsette.
- Dei er vår viktigaste ressurs.

Kunstnar tok initiativet

Ved utdelinga opplyste jurymedlem Svein Sportsøl at idéen til prisen opphavleg stamma frå kunstnaren Per Kleiva som under ei kunstutstilling i Geiranger traff ein lokal kar som var svært så negativ, og som meinte at alt var galt eller heilt sikkert kom til å gå galt.
- Kleiva meinte at her var det stort behov for ein optimistpris, og slik vart det.
Prisen vart i år utdelt for sjette gong.