Oskar Sylte i minus etter inntektshopp

Oskar Sylte Mineralvannsfabrikk i Molde auka omsetninga i fjor til 88 millionar kroner. Året enda likevel med eit underskot, viser rekneskapen for 2023 (sjå tabell under).

Brusfabrikken hadde 37 tilsette i arbeid i fjor, ifølgje årsmeldinga.

Kjem frå fleire gode år
Molde-selskapet hadde eit jubelår i 2022 med god lønnsemd og eit overskott på meir enn åtte millionar kroner.

Også 2021 og 2020 var gode år for brusfabrikken, som sleit nokre år etter at eit samarbeid med Ringnes blei avslutta i 2015.

Fram til 2019 gjekk Molde-selskapet med tap, men salet av eigne produkt auka på nytt i tillegg til meir leigeproduksjon.

Sidan 2014 har selskapet vore 100 prosent familieeigd. Aksjonærane er no Oskar Dag Sylte med 60,1 prosent og Ingunn Molden Sylte med resten.

Ser positiv utvikling i salet
Selskapet ser ei positiv utvikling i salet for 2024 og god etterspurnad etter produkta deira. Investeringa av ei ny tappelinje for boksar og glas i fjor, bidreg til å auke kapasiteten.

Styret påpeiker i årsmeldinga at selskapet har god evne til å gjere nye investeringar med eigne midlar.

Eigenkapitalen i selskapet var på kring 33 millionar kroner ved utløpet av 2023. I løpet av fjoråret auka også den langsiktige gjelda betydeleg til 45 millionar kroner grunna ein finansiell leasingavtale.