Stian Bang Pir foto marius
ÅLESUND: Parkly jobbar med dei største eigedomsaktørane i landet, og vil vekse internasjonalt. Dagleg leiar og gründer Stian Bang trur dei vil ha nye eigarar i løpet av få år. Foto: Marius Rosbach
Nytt

Parkly-sjefen trur på sal - men først vil dei vekse

– Interessa er spinnvill, fortel gründer Stian Bang. Trur ikkje han sjølv vil ha råd til å halde fram eigar som i dag.

Marius Rosbach
07.05.2026

– Trur eg at vi blir selt? Ja, det trur eg faktisk. Og trur eg vi blir selt ut av Norge? Ja, det trur eg også. 

Det fortalde Parkly-gründer Stian Bang til ein nær fullsett sal på Pir onsdag. Anledninga var eit seminar om eigarskap og vekst, og Bang kunne fortelje at det ikkje mangla på friarar. 

– Eg vil påstå at vi nesten blir nedringt av internasjonale selskap som har lyst til å investere i oss, sa han.

Oftast kvar veke er han i møter med aktørar frå ulike delar av verda. Likevel jobbar dei ikkje aktivt med eit sal, fortalde han til Nett No etter seminaret. 

– Kanskje skjer det om eitt år, kanskje tre - eller kanskje aldri. Men interessa er spinnvill, seier Bang. 

– Trur ikkje eg har råd til å bli sittande
Gründeren legg ikkje skjul på at hans eige ønske om ein exit eller gevinst, ligg til grunn for spådommen. 

– Eg skal vere sopass ærleg. Men det handlar også om at eg trur ikkje eg har råd til å bli sittande. Eg har ikkje store formuen, men er nøydd til å realisere noko kvart år for å betale skatten. Og jo meir Parkly blir verdt, jo større problem har eg, legg han til. 

I dag eig Bang knappe 20 prosent av aksjane i selskapet gjennom sitt eige selskap. Dei største aksjonærane elles er Egil Giørtz, Erik Haug Herje, Norgesgruppen, Thon Gruppen og Pir-nettverket i Ålesund. 

Har kontraktar for 270 millionar
Teknologiselskapet er i full gang med å rulle ut løysingane sine på parkeringsplassar i Finland, Sverige og Danmark. Og inntektene har starta å kome inn for alvor.

I år ligg selskapet an til å omsette for kring 210 millionar kroner, og det er signert kontraktar på kring 270 millionar, ifølgje Bang. I dag blir alt dei tenar investert tilbake i selskapet for vidare vekst. 

 – Vi får høyre at vi bør kome oss raskt ut i Europa og meiner potensialet for å vekse er stort. Kanskje kan vi også gjere dette i to fasar, ved at vi først veks ei stund i Europa, før vi tek USA og resten av verda, seier han om vegen vidare. 

Stian bang seminar foto Marius
RASKT VEKST: Stian Bang har vært med å bygge fleire selskap. Grafen til venstre er vekstkurva til Avento som blei kjøpt opp av Visma. Til høgre er kurva til Parkly. Foto: Marius Rosbach

Thon Gruppen avgjerande 
Under seminaret fortalde Bang korleis ting endra seg for Parkly etter Thon Gruppen kom inn som kunde – og på eigarsida. 

– Da var det ingen som lengre stilte spørsmål ved kven vi var, sa han. 

Han meiner Thon Gruppen har vore avgjerande for utviklinga. 

– Utan dei så vil eg gå så langt som å seie at at vi truleg hadde vore konkurs i dag. Det er dei harde realitetane, sa han. 

– I dag jobbar vi med dei største eigedomsaktørane i landet, la gründeren til. 

Publisert: 07.05.2026 05:00

Sist oppdatert: 07.05.2026 12:12

Mer om