Punktum etter to år og fem månader

Møre og Romsdal tingrett har avslutta nyleg bubehandlinga etter konkursen i bemanningsselskapet Submet. 

Selskapet som hadde adresse på Vatne Industripark, er no sletta. 

Submet leverte arbeidskraft til skipsindustrien og entreprenørbransjen. Konkursen råka 56 tilsette då det vart kroken på døra hausten 2022 og var mellom dei mest omfattande det året.

Bakgrunnen for konkursen var manglande oppdrag i desse næringane i kjølvatnet av koronapandemien. 

Måtte vente to år på lønn
Årsaka til at det først blir sett punktum for saka to år og fem månader etter det blei meldt oppbod, har mellom anna å gjere med omfattande arbeid for bustyrar med dei 55 lønnskrava. 

Nett No har tidlegare fortalt at fleire tidlegare tilsette måtte vente lenge på utbetaling av løn dei hadde til gode. 

Bustyrar Anders Svinø fortalde då at ventetid på dokumentasjon frå rekneskapsførar og lang saksbehandlingstid hos Nav medverka til den lange bubehandlinga. 

Etter å ha brukt 144,5 timar på saka, leverte Svinø ei rekning til tingretten på knappe 209.000 kroner. 

Berre smular att til kreditorane
Konkursen var mellom dei største i regionen det året, både målt etter talet på tilsette som blei råka og omsetning på selskapet. 

I sluttrapporten frå bustyrar kom det fram at dei samla krava kom opp i drygt 7,6 millionar kroner. Berre smular blei att til prioriterte kreditorar som fekk knappe 4,3 prosents dekning.