Refser Aftenposten: – Heilt uforståeleg

Fleire har sett raudt etter ein sarkastisk kommentar i Aftenposten, som tok for seg søksmålet ørstingen Lars Oscar Øvstegård har tenkt til å ta ut mot staten i kampen mot formuesskatten. Artikkelen vart skriven med utgangspunkt i førre vekes pressekonferanse i Oslo, der grunnlaget for søksmålet blei lagt fram.

Stortingspolitikar Alfred Bjørlo (V) og fylkesordførar Anders Riise (H) Møre og Romsdal er mellom dei som reagerer då Nett No tek kontakt tysdag. Dei reagerer både på innhaldet i kommentaren - og at avisa etterpå ikkje ønska å trykke eit tilsvar frå Øvstegård.

– At dei ikkje tek inn eit tilsvar er heilt uforståeleg. Det meiner eg er brot på god presseskikk, seier Bjørlo til Nett No.

Snudde etter at Nett No tok kontakt
Årsaka til at avisa ikkje ville publisere tilsvaret, vart ikkje nærare grunngjeve, utover omsynet til plass.

Etter at Nett No tok kontakt med redaksjonen med fleire spørsmål om saka, opplyser debattredaktør Erik Tornes at dei har oppmoda Lars Oscar Øvstegård om å sende eit forkorta versjon av sitt innlegg - som dei vil publisere.

Det høyrer også med til historia at avisa onsdag 18. september publiserte eit innlegg frå Øvstegård sin støttespelar Glen Agung Hole.

Meiner avisa sparkar nedover
Stortingsrepresentant Bjørlo frå Eid påpeikar at til eksempel ein topp-politikar må tole å få «litt røff» behandling i media, utan at ein nødvendigvis får ta til motmæle alltid.

– Men det er ikkje tilfelle i denne saka. Her kjem ein vanleg fyr frå Ørsta som har sett i gong ei kronerulling for å kjempe denne saka, og som ikkje har eit stort apparat og betalte rådgjevarar i ryggen, seier han.

– Også vel ei av landets største aviser å raljere over saka, utan å finne ut meir om kva dette er. Det held ikkje, held Bjørlo fram.

(I den første versjonen av denne saka vart det framstilt som at journalisten ikkje var på pressekonferansen. Det stemmer ikkje, og vart retta onsdag 18. september kl. 10.15 journ anm.)

Venstre-politikaren meiner media gjerne skal slå hardt oppover, men at hovudstadsavisa i dette tilfelle sparkar nedover.

– Samtidig gir dei inntrykk av at dette var ei samling for eliten, legg Bjørlo oppgitt til.

Fylkesordføraren: – Svak journalistikk
Fylkesordførar Anders Riise er ikkje mindre forarga: – Det er svak journalistikk, seier han til Nett No om saka.

Høgre-politikaren meiner Aftenposten sin kommentar publisert 9. september viser liten forståing for korleis formuesskatten verkar.

Han påpeiker at avisa likevel er i sin fulle rett til å skrive ein kommentarartikkel: – Men eg synes avisa dreg det til litt langt, legg han til.

Som Bjørlo, stiller Riise spørsmål ved den presseetiske vurderinga til avisa, når dei først ikkje vil ta inn eit motsvar frå Øvstegård.

– Det er ei stemoderleg behandling av ein småbedriftseigar som han ikkje fortenar. Eg meiner avisa både burde latt Øvstegård kome til orde, og at dei burde gjort eit intervju om kva saka handla om, seier Riise.

Heile seansen blei strøyma på nett slik at det var mogleg å få med seg innhaldet.

«Helt skrint kan det likevel ikke være»
Innleiingsvis i Aftenposten-kommentaren understrekar journalist Andreas Slettholm at PR-byrået Geelmuyden Kiese var på plass på pressekonferansen, saman med juridiske tungvektarar og den sveitsiske ambassadøren.

Han skriv at Øvstegård sin bodskap er at formuesskatten ei form for statleg tjuveri, som råkar langt fleire enn dei superrike. Mange små og mellomstore bedrifter slit med auka skatterekningar, meiner ørstingen.

«Helt skrint kan det likevel ikke være for småbedriftseier Øvstegård og hans nettverk», heiter det vidare i kommentaren som peikar på at det er samla inn to millionar kroner til arbeidet.

«Selv om det kan oppleves blodig urettferdig, er nå engang innretning av skattesystemet et utpreget politisk spørsmål», skriv Aftenposten-journalisten og konkluderer med at opinionen i slike saker neppe blir vunne i rettssalen.

«Det spørs om ikke de 2 millionene dette koster, i stedet hadde gjort større nytte som arbeidende kapital», heiter det avslutningsvis.

Vil fjerne formuesskatt på arbeidande kapital
Som kjent ønsker Lars Oscar Øvstegård å fjerne formuesskatt på arbeidande kapital, fordi han meiner den er urettferdig og øydeleggjande for norskeigde bedrifter.

Under pressekonferansen la jussprofessor Mads Andenæs, tidlegare leiar av Efta-domstolen Carl Baudenbacher og leiar for konkurransetilsynet i Sveits og menneskerettsadvokat, Laura Baudenbacher, fram sitt syn på kvifor dei meiner skatten bryt med menneskerettane og grunnlova.

Målet er å levere eit søksmål til rettsapparatet i løpet av kort tid.