Reiselivet vil ha kontantfritt Noreg

(NPK-NTB-Christofer Gabrielsen): I 2013 svarte 47 prosent at dei føretrekte å bruke kontantar på utestader og restaurantar. To år seinare er talet sokke til 29 prosent, viser ei spørjeundersøking i NHO Reiseliv-rapporten «Et kontantfritt reiseliv – Norge blir kontantfritt».
– No må styresmaktene på bana, seier rapportforfattar Kai Olsen, som også er professor i informatikk, til NTB.
Han meiner det er underleg at bedriftene må akseptere kontantar som er på veg ut uansett, medan styresmaktene på andre område tvingar næringslivet til å ta i bruk digitale løysingar.
– Noregs Bank og Finansdepartementet må ta vekk reglane om at ein må akseptere kontantar. Styresmaktene er like trege som plateselskapa var for 50 år sidan. Dei heng att fordi dei trur vi lever i ei anna tid, seier Olsen.

Svarte pengar

Av 333 bedriftsleiarar i reiselivsnæringa svarar litt over halvparten at dei ville vurdert å seie nei til kontantar dersom dei fekk moglegheita. Fleire seier at kortbetalingar går mykje raskare enn betaling med kontantar. Det blir også nemnt at reknekunnskapane til sommarvikarane ikkje er gode nok når kontantkassa skal gjerast opp.
Dessutan er det kostnader ved å halde kontantar, både gebyr og tidsbruk, seier næringspolitisk fagsjef Ingjerd Sælid Gilhus i NHO Reiseliv.
– Det å forby kontantar er ei løysing som også vil redusere den svarte omsetnaden, seier ho.
I juli i fjor slo Finans Norge fast at alt ligg til rette for at Noreg kan bli det første kontantfrie samfunnet i verda.
Direktøren for prosessområde bank, Jan Digranes, peikte på at kontanthandtering kostar samfunnet det dobbelte av elektronisk betaling, og utan kontantar vil også problema med ran, økonomisk kriminalitet og svarte pengar bli kraftig redusert, meinte han.

Seier nei

I Danmark blir det vurdert å avvikle retten forbrukarane har til å betale kontant frå nyttår. I Sverige kan bedrifter allereie nekte å ta imot kontantar.
– Trenden er heilt klar. Vi går mot eit kontantlaust samfunn, seier Gilhus.
Det er ikkje Forbrukarrådet heilt einig i.
– For dei aller fleste er det bra. Men vi er opptekne av å vareta alle grupper. Då må det framleis finnast enkle måtar å betale for eksempel buss, legar og kino på, seier direktør for forbrukarservice Ingeborg Flønes i Forbrukarrådet.
Statssekretær Jon Gunnar Pedersen (H) i Finansdepartementet seier det ikkje finst nokon planar om eit heilt kontantfritt samfunn.
– Både tradisjon, personvern og tryggingsutfordringane i ny teknologi gjer at vi kjem til å ha bruk for kontantar lenge. Det er framleis nokon som har rettmessige behov for å kunne gjere opp for seg med kongens mynt, og det skal ein få lov til, seier han.