Norske gjestar ga meir «liv og røre» i sentrum

2020-rekneskapet til Stryn Camping viser at fjoråret blei eit rekordbra år for campingplassen i Stryn sentrum.

Både omsetning og overskot er høgare enn tidlegare år (sjå tabell under). Driftsresultatet på drygt 600.000 kroner, gir ein solid driftsmargin på meir enn 15 prosent.

– Vi hadde meir folk i juni og august enn vi brukar å ha, fortel Line Bø Håheim til NETT NO.

Håheim driv overnattingsstaden saman med mannen Frank Håheim, og fortel at dei gjerne nyttar overskotet i bedrifta til å heve standarden, til dømes som å pusse opp bad og liknande.

Snart fullbooka i juli
Campingplassen er ope heile året og tek i mot gjestar som vil overnatte både i hytte, leilegheit, bubil eller telt.

Håheim fortel at det også er ein trend at folk reiser meir, utanom høgsesongen om sommaren, som er med å auke besøket.

Dei fleste gjestane i fjor var nordmenn, og slik blir det også i år. Mange har allereie booka seg inn.

– I juli er det nesten fullt allereie, seier ho.

– Meir liv og rør i Stryn sentrum
Innehavaren fortel at det ikkje er så stor skilnad for deira del med norske gjestar, samanlikna med utlendingar. Men ho er ikkje i tvil om at det gir ringverknader for den populære turistdestinasjonen.

– Vi merkar at nordmenn gjerne handlar meir og går ut for å ete middag og ta eit glas vin. Slik sett blir det meir liv og røre i Stryn sentrum. Utlendingane går gjerne meir i naturen og er litt meir sparsommelege, legg ho til.

Campingplassen har vore i drift ved den tilhøyrande garden sidan 1964. I 2006/07 blei drifta lagt inn i eit as. Bedrifta sysselsette 1,7 årsverk i fjor.