Selde fisk for 1,5 milliardar

Trass i at Jangaard Export i 2020 selde fisk for over 1,5 milliardar kroner, sat konsernet att med berre 4,8 millionar kroner i resultat før skatt.

Dette går fram av årsrekneskapet, som no er klart (sjå tabell under).

I 2019 var omsetninga vel 1,6 milliardar, og resultat før skatt 30,5 millionar.

West-Norway
I konserntala for Jangaard Export inngår no også tala for selskapet West-Norway, som Jangaard Export kjøpte 63 prosent av i 2019.

Oppkjøpet har ført til ein kraftig auke i omsetninga for Jangaard-konsernet ettersom West-Norway i 2019 selde fisk for 731 millionar kroner.

Ved oppkjøpet av West-Norway vart det sagt at Jangaard Export ville få betre tilgang til den brasilianske marknaden, medan West-Norway ville få betre tilgang til Brasil.

I 2020 hadde derimot West-Norway eit resultat på minus 8,3 millionar kroner.

Store på klippfisk
Konsernet er av dei leiande i eksport av klippfisk, men ein produserer også saltfisk og ferskfisk.

I 2020 vart det seld for 60 millionar kroner til norske kundar, medan det vart seld fisk for 940 millionar kroner til europeiske kundar utanom Norge.

Jangaard Export har hovudkontoret i Ålesund, men har eigne anlegg i Vestvågøy, Averøy, Vågan, Andøy og Røst, i tillegg til Ålesund.

29 prosent kvinner
Selskapet eig også 60 prosent av eit spansk selskap, samt 50 prosent av selskapet North Export i Gjesvær.

I morselskapet arbeidde det ved årsskiftet 93 årsverk, der 29 prosent var kvinner.

I konsernet er det derimot 139 årsverk.

Det totale sjukefråveret i 2020 var på tre prosent.

Eigenkapitalen er på solide 299,8 millionar kroner, medan den langsiktige gjelda er på 254,1 millionar.

Konsernet er eigd av Gunnar og Leif Haagensen.