Selskapet bak Toldboden konkurs

Selskapet HIIX, som tidlegare gjekk under namnet HR Restaurantdrift, har meldt oppbod.

Ålesund-firmaet fekk nyleg ei bot på 75.000 kroner for brot på Covid-19-forskrifta. Utestaden var sentralt då eit større smitteutbrot oppstod i byen i vår.

Ein halv million i gjeld
Ifølgje ordskurden – avgjerda - frå Møre og Romsdal tingrett, har eigaren opplyst at gjelda i selskapet er på ein halv million kroner. Det skal ikkje vere større verdiar i selskapet.

Verksemda har vore innstilt sidan smitteutbrottet og to tilsette er sagt opp, fekk retten opplyst vidare.

– Det er den økonomiske situasjonen totalt sett, som ser ut til å være årsak til konkursen, fortel bustyrar Kristine Grønbech Rolland Devold til NETT NO.

Selskapet endra namn til HIIX tidlegare i juni, og endra formål frå restaurantdrift, til event- og arrangørbransjen.

Blir truleg ikkje rettssak
Nyleg blei det kjent at selskapet nektar å betale bota for brot på smittevernlova. Dette spørsmålet skal i utgangspunktet avgjerast i ei rettssak.

Politiadvokat Mathias Häber i Møre og Romsdal politidistrikt fortel til NETT NO at dei har fått svar frå firmaet, om at dei ikkje godtek førelegget for brotet på Covid-19-forskrifta. Førebels er ikkje saka sendt til tingretten for hovudforhandling.

– Vi vurderer situasjonen, men det er truleg at det ikkje blir noko av rettssaka, fortel politiadvokaten når han får høyre om konkursen.

Ikkje verdiar å ta hefte i
Per i dag er ikkje bota rettskraftig, og rettsapparatet har difor ikkje noko krav i buet.

– I ein situasjon der kassa er tom, er det heller ikkje mogleg å ta hefte i eit pengebeløp for å sikre ein eventuell fremtidig dom på bot og sakskostnadar, legg politiadvokaten til.

Bustyrar Kristine Grønbech Rolland Devold fortel at ho ikkje har full oversikt, men at det er ein del tilkallingsvikarar som truleg har utestående feriepenger. Slike krav blir handtert av lønnsgarantiordninga.

Saka blir oppdatert