Ser kjernekraft som løysinga

– Det er vanskeleg å sjå for seg dette her her utan at vi får ei utvikling i retning kjernekraft, seier Inge Bertil Straume i i skipsdesignselskapet Skipsteknisk i Ålesund.

Selskapet er involvert i fleire prosjekt for å finne CO2-utsleppsfrie alternativ til diesel i fiskeflåten.

I førre veke snakka Straume og kollega Vegard Nesset Hjelvik om kva som er status for alternativ til diesel, på arrangementet Pelagisk Arena i Ålesund. Slik dei ser det i dag er fiskebåtar på kjernekraft svaret om fiskeflåten skal bli heilt CO2-utsleppsfri.

Dyrt og risikabelt
Både hydrogen og ammoniakk er for dyrt, risikabelt og det regulatoriske regelverket er ikkje på plass.

For å vere CO2-utsleppsfritt må hydrogen, eller ammoniakk vere produsert av straum fra vasskraft, solkraft, vindkraft eller atomkraft. Prosessen frå produksjon, til ammoniakk eller hydrogen lagar elektrisitet som kan drive el-motorane om bord på eit skip gir eit stort og fordyrande energitap samanlikna med om elektrisiteten blir brukt direkte eller først til å lade batteri.

Det mest nærliggande og interessante for å få utsleppa ned er bruk av metanol, etter Straume si vurdering. Ein stor fordel med metanol er at den kan brukast i vanlege forbrenningsmotorar.

– Det blir nærare som diesel å handtere, seier Straume.

Om metanol også er framstilt i ein prosess som omdannar trevirke til til metanol, utan bruk av energi frå fossile energikjelde, vil det også vere ei energikjelde som ikkje auka CO2-utsleppa.

Kjernekraft-seminar
Straume og Nesset Hjelvik er ikkje åleine om å vurdere kjernekraft som ei alternativ energikjelde for skipsfarten.

Tysdag er klyngeorganisasjonen GCE Blue Maritime i Ålesund arrangør av eit seminar om kjernekraft og skipsfart.

Blant innleiarane er representantar både for Lloyds Register, Det Norske Veritas (DNV), NTNU og Ulstein Design.

Les programmet her (ekstern lenke)