Sjømatbedrifter bygger nytt og flytter saman

Så snart alle papira er i orden, vil spaden bli sett i jorda for eit nytt kontorbygg i Nørvevika i Ålesund. På nabotomta til Aalesund Protective Wear vil det kome eit bygg på tre etasjar pluss parkeringskjellar. 

Eigarane i fiskeeksportørane Ocean Supreme og Norwegian Seafood Company står bak satsinga. Målet er å skape eit miljø med fleire bedrifter i fiskeri- og sjømatbransjen.

– Vi ønsker å styrke fagmiljøet i Ålesund, fortel Ocean Supreme-sjef Botholf Stolt-Nielsen til Nett No. 

Han tek i mot Nett No på tomta saman med Norwegian Seafood Company-sjef Leif Birger Midtgård, byggherre og arkitektar. 

Håpar å flytte inn i løpet av 2026
Partnarane treng sjølv om lag halvparten av bygget, og har planar om å leige ut resten til andre aktørar i bransjen. 

– Vi vil etablere eit kontorfellesskap både for våre selskap og andre bedrifter i sjømatbransjen i Ålesund, seier Stolt-Nielsen.

Bygget blir totalt på drygt 4200 kvadratmeter og vil delvis ligge på ei fylling i sjøen. Det er teikna av Ole Søvik og Margarida Pais i firmaet Margarida Pais Arkitektur og Peab K. Nordang har fått oppdraget med sjølve bygginga. 

Investeringa er på kring 130 millionar og målet er å flytte inn siste halvdel av 2026. 

– Potensiale i å samle næringa
Sjølv om tidspunktet for å bygge nytt knapt kan seiast å vere det mest gunstige når det gjeld byggekostnader og rente, meiner aktørane satsinga vil stå seg i det lang løp. 

– Sjølv om det er mykje bra med fagmiljøet i Ålesund allereie, så er det viktig at vi jobbar for å utvikle det vidare. Det er stor konkurranse med andre regionar og vi er avhengige av fleire kloke hovud, seier Stolt-Nielsen

Han viser til ordtaket som Idar Ulstein gjerne framførte, om at bedriftene må samarbeide når dei kan, og konkurrere når dei må. 

– Vi trur at det ligg ein del potensiale i å samle næringa i eit felles kontorbygg, legg han til.

Både arbeidsplassar og fagmiljø teller
Dei to partnarane som flytter saman i Nørvevika, omsett for nærare 3,5 milliardar kroner årleg ved å selje fisk til store delar av verda. 

Ocean Supreme er store på laks og øret, medan kvitfisk er Norwegian Seafood Company sin spesialitet. 

Dagleg leiar Leif Birger Midtgård i Norwegian Seafood Company påpeiker at ein del av fiskerinæringa har forsvunne frå Ålesund i løpet av dei siste tiåra. 

– Vi må jobbe med å bli endå betre for å sikre oss nye medarbeidarar. Då må både arbeidsplassane og fagmiljøet rundt vere attraktive, seier Midtgård. 

Brems for leverandørindustrien
Stolt-Nielsen kom til Ålesund på 1990-talet då Pan Fish blei etablert. Han meiner det var eit miljø som i seg sjølv gjorde det interessant for folk å kome til byen for å jobbe her. 

Sidan blei Pan Fish kjøpt opp og hovudkontoret forsvann. Det bidrog til at Ålesund sin posisjon i fisker- og sjømatbransjen blei svekka.

Dei siste åra har grunnrenteskatt på oppdrett bremsa aktiviteten for store delar av leverandørindustrien til oppdrett på Nordvestlandet. 

Ei slik utvikling kan true Ålesund sin posisjon som den kommunen i landet med størst verdiskaping frå sjømat. 

– Treng å rekruttere ungdom
Botholf Stolt-Nielsen påpeiker at det er viktig at bedrifter ønsker å ha hovudkontor på Sunnmøre. Det gir regionen meir tyngde, samtidig som den blir meir attraktiv. 

– Bergen har klart å bygge eit større miljø dei siste åra, og det er personar som like gjerne kunne jobba her oppe, legg Leif Birger Midtgård til. 

Næringa vil ha stort behov for å rekruttere fleire dei neste åra. Samtidig opplever dei at bransjen har hatt vanskeleg for å bli populære hos dei unge som skal inn i arbeidslivet. 

Satsinga i Nørvevika, nokre steinkast frå Campus Ålesund og Norsk Maritimt Kompetansesenter, håpar dei skal vere eit steg i rett retning. 

– Vi ser at vi treng å rekruttere ungdom inn i bransjen, og at det er i ferd med å bli ein forgubbing. Og om vi skal fornye oss, så er vi nøydt til å ha attraktive arbeidsplassar, seier Leif Birger Midtgård.