– Vi ser at marknaden kjem tilbake igjen

Onsdag startar Gath-konferansen i Ålesund som samlar leverandørar av utstyr og tenester til oppdrettsbransjen.

Bransjen har vore gjennom eit par tøffe år sidan dei var samla til konferanse sist – ikkje minst grunna den mykje omtala lakseskatten.

I forkant av konferansen har dei fleste medlemsbedriftene i nettverket levert sine årsrekneskap for 2023. For dei av bedriftene som lever av å lage og selje utstyr til bransjen, viste tala kraftige inntektsfall.

Inntektsfall på over éin milliard
Berre for dei fire selskapa Artec Aqua, MMC First Process, Optimar og Cflow er det snakk om reduserte inntekter på meir enn éin milliard kroner.

Artec Aqua-direktør Ingegjerd Eidsvik meiner det ikkje bør kome som ei overrasking på nokon.

– Vi sa at dette kom til å bli tøft og grunnrenteskatten er ei viktig årsak til at det stoppa opp, og ga dei konsekvensane som vi ser i 2023-resultata, seier ho til Nett No.

Bildet er likevel ikkje heilsvart. Møre Aquaculture gjekk mot straumen og auka si omsetning og resultat (sjå tabell under).

Inflasjon og trege politiske prosessar
Høgare inflasjon har vore med å bremse comebacket for dei store ordremengdene til utstyrsleverandørane.

– Vi ser at marknaden kjem tilbake igjen. Men inflasjonen gjer at fleire må ta ei runde med optimalisering av prosjekt før dei er klare til å ta ei investeringsavgjerd, legg Eidsvik til.

Stans i nye konsesjonar og politiske prosessar som har teke langt lengre tid enn bransjen hadde venta, har vore ei ekstra utfordring.

– Nyleg kom forslag til nytt regelverk på høyring. Det var eit arbeid som skulle ta seks månader, men enda opp med å ta to år. Det har nok også bidrege til at enkelte prosjekt har teke lengre tid å realisere, seier Artcec Aqua-sjefen.

Aktiviteten er på veg opp
Sidan Artec Aqua er del av det børsnoterte Endúr-konsernet er det avgrensa kva ho kan seie om utsikter og tal.

Men det er ingen tvil om at aktiviteten er på veg opp i år – og Eidsvik påpeiker at ho ser optimistisk på framtida.

Selskapet har spesialisert seg på anlegg til landbasert oppdrett. I år har dei mellom anna sikra seg milliardoppdrag for ei anna bedrift i GATH-nettverket, Salmon Evolution.

– Vi er i gong med andre byggetrinn på deira anlegg på Indre Harøy. Det kjenst godt å kome i gong med eit så stort prosjekt i Norge, seier Eidsvik.

Meir til skatt - mindre til investeringar
Artcec Aqua er også involvert i store planar om landbasert oppdrett på Island, som kan bety betydeleg med inntekter.

– Vi ser også at det er fleire førespurnader på marknaden for smolt og postsmolt. Det er ein skilnad frå slik det var etter grunnrenteskatten kom, seier ho.

Den langsiktige effekten av eit skjerpa skattetrykk for oppdrettsbransjen tør Artec Aqua-sjefen ikkje spå noko sikkert om.

– Totalt sett vil det vere mindre å investere for i bransjen med høgare skatt, men verda vil uansett ha behov for fisken, seier ho.