Sjømatbransjen må stålsette seg for britisk WTO-toll

(NPK-NTB): Norsk sjømat vil i utgangspunktet møte toll på WTO-nivå på den britiske marknaden, sa Elisabeth Vik Aspaker (H) i eit møte i Stortingets europautval denne veka.
– WTO-systemet kan bli det systemet vi eventuelt må leve med ei stund før vi får til ein norsk avtale, utdjupar ho overfor NTB.

Som med USA

Når Storbritannia går ut av EU, må Storbritannia i første omgang etablere seg som sjølvstendig medlem i WTO. Det vil truleg bety tidkrevjande og teknisk vanskelege forhandlingar med dei andre medlemmene i WTO. Men når ein avtale er på plass, vil WTO vere det formelle grunnlaget for handelen, tilsvarande som for handelen Noreg i dag har med USA, forklarte Vik Aspaker i Stortinget.
– Kva dette konkret vil bety for marknadstilgangen for norsk næringsliv i Storbritannia er ikkje openbert, men realistisk sett kan vi i første omgang møte tollsatsar og andre hindringar.
- Eksempelvis vil norsk sjømat i utgangspunktet møte toll på den britiske marknaden på WTO-nivå, sa ho.
Overfor NTB strekar Vik Aspaker under at regjeringa vil gi høg prioritet til marknadstilgang for norsk sjømat når Noreg skal forhandle fram nye handelsavtalar med britane. (©NPK)