Sjømatproduksjonen vil auke, særleg i land-oppdrett

NPK: – Basert på innsikt frå databasen vår, trendar i marknaden og diskusjonar med ei rekke industriekspertar, viser dei overordna prognosane våre meir enn ei dobling av globalt produksjonsvolum når vi kjem til 2040. Det svarar til eit produksjonsnivå på 5,8-6,6 millionar tonn i 2040, seier Eirik Moe, nordisk leiar for Marine og Aquaculture i EY, i ei pressemelding.

Les heile analysen her

Revisjons- og rådgivingsselskapet EY lanserte onsdag sin årlege rapport om sjømatsektoren. Analysane er basert på EYs innsikt frå å ha jobba tett med bransjen globalt, i tillegg til finansielle data frå 1.082 selskap i oppdrettssektoren og 2.399 selskap innan fiskeri.

Landoppdrett blir meir vanleg

Rapporten spår at sjøbasert oppdrett vil auke med over 60 prosent globalt dei neste 20 åra, medan landbasert oppdrett vil få internasjonalt fotfeste med omtrent halvparten av dagens sjøbaserte produksjonsvolum.

– Det er verkeleg fascinerande å sjå interessa for landbaserte oppdrettsselskap og prising av desse selskapa i milliardklassen. Vi meiner at landbasert oppdrett vil vekse fram og komplettere sjøbasert produksjon i åra framover, men den verkelege produksjonsauken vil vi ikkje sjå før om ein god del år. Fram mot 2040 trur vi landbasert produksjon vil utgjere ein stadig større del av lakseproduksjonen i verda, seier Moe.

Ifølgje rapporten er dei største konsentrasjonane av planlagt landbasert oppdrett å finne i Noreg, Nord-Amerika og Asia.

Regionale og lokale marknader

Moe fortel vidare at pandemien har sett sitt preg på sjømatbransjen, og han ser tendensar til eit mogleg paradigmeskifte i lakseprisinga.

– Prisane i USA har halde seg, men i Europa har dei gått ned. Det vi ser er nok både eit resultat av regionale handelshinder og utfordringar med å eksportere varer i ei verd der reising har vore svært avgrensa, og etter 70 år med vekst i global fri handel har det oppstått «lukka» regionale og lokale marknader – noko eg trur vi vil sjå meir av i åra framover, seier Moe.