Skattedirektøren vil påskjøne sjekk av sjølvmeldinga

(NPK-NTB): – Når over 400.000 nordmenn ikkje ein gong kastar eit blikk på sjølvmeldinga, må vi spørje om forenkling har gjort det for enkelt, skriv Holte i ein kronikk i Dagens Næringsliv tysdag.
Han skriv at til saman 426.000 lønnstakarar og pensjonistar ikkje hadde sjekka dei førehandsutfylte opplysningane då fristen gjekk ut 30. april.
– Dei kan ha gått glipp av frådrag dei har krav på, dei kan risikere å bli overraska med restskatt, og sist men ikkje minst: Dei kan bli gjort ansvarleg for feil som bankar og arbeidsgjevarar har gjort, skriv han.

Kjappare oppgjer

Holte seier til same avis at han ønskjer ei ordning som gjer at dei som faktisk sjekkar sjølvmeldinga, skal få eit kjappare skatteoppgjer enn dei som lèt vere.
– Vi jobbar mot at det skal vere mogleg å melde inn endringar som får skattemessig konsekvensar gjennom året. Det gjer at skatten blir justert umiddelbart. Då vil også oppgjeret vere klart tidlegare.
- Dersom skattytar går inn og godkjenner grunnlagstala vi har, kan oppgjeret gjerast raskt etter nyttår, seier Holte.

Skatteoppgjer onsdag

Dette kan dreie seg om sal av bustad, overgang frå lønnstakar til pensjonist og sal av aksjar og fond.
– Det kan få konsekvensar for kva du har i forskotstrekk og merkast på lønnsslippen raskt. Det trur vi vil gjere folks meir bevisste på skatt, seier Holte.
Det for mange etterlengta skatteoppgjeret kjem onsdag denne veka.