Skatteetaten slo til mot ny bedrift – konkurshopp i januar

Vestnes-firmaet 3al Crewing er konkurs som følgje av krav frå skatteetaten på 1,2 millionar kroner.

Kravet stammar frå manglande betaling av arbeidsgivaravgift og skatt i fjor, ifølgje rettspapira frå Møre og Romsdal tingrett.

Konkurshopp i januar
Konkursen blei opna måndag, som betyr at det løpet av årets første månad blei opna 17 konkursar i Møre og Romsdal fylke.

Det er eit kraftig hopp samanlikna med snittet i fjor, som var på 11 konkursar per månad.

I koronautsette bransjer, som reiseliv og servering, er det framleis få bedrifter som har gått over ende.

Gjeld på 4,6 mrd. skal betalast
Fleire av konkursane kjem som følgje av krav frå Skatteetaten.

Styresmaktene har teke opp att inndrivingsarbeidet, etter at det ei periode var «koronaamnesti» for konkurstrua bedrifter.

– No behandlar Skatteetaten konkursar som vanleg, og gjer ei konkret vurdering i den enkelte sak, fortalde Stian Solheim som er seksjonssjef ved juridisk stab i divisjon innkreving i Skatteetaten, til NETT NO tysdag.

Skatteetaten ventar ei auke i konkursar framover, når ei samla gjeld på kring 4,6 milliardar skal betalast tilbake i løpet av året.

Manglande oppdrag skal vere årsak
Styreleiaren i Vestnes-selskapet 3al Crewing hadde ingen innvendingar mot konkursopninga i tingretten denne veka. Verksemda i firmaet er innstilt og det var ikkje tilsette i selskapet på konkurstidspunktet.

Ifølgje årsrapporten frå 2020 var det då ni årsverk i selskapet og selskapet har dreve utleige av mannskap til systerselskapet Aas Kystservice.

Bustyrar Ingrid Larsen Høgby påpeiker at ho ikkje har full oversikt over saka.

– Det er opplyst at manglende oppdrag er årsaken til konkursen, forteller Høgby til NETT NO.

Ho er førebels ikkje kjent med om det er andre krav mot selskapet.

Godt resultat i 2020
Rekneskapa sidan oppstarten i 2018 viser ei årleg omsetning på mellom 6,7 og 9,7 millionar for 3al Crewing.

Alle åra har gått med overskott. Siste tilgjengelege rekneskap frå 2020 viser eit svært godt resultat med eit overskott på meir enn tre millionar.

Selskapet har bokført betydeleg konserngjeld, og i løpet av åra 2018-2020 er det tatt ut konsernbidrag på nær tre millionar.