Solid auke for regionavisene

For andre året på rad fell avisopplaget, viser tal frå Mediebedriftenes Landsforening (MBL).

For regionavisene peikar tala likevel oppover – og dei største avisene på Nordvestlandet er ikkje noko unntak. Sunnmørsposten og Romsdals Budstikke var avisene i regionen med størst opplagsauke i reine tal.

Sjå opplaget for avisene på Nordvestlandet under

Sunnmørsposten auka opplaget med 890 aviser i 2023 samanlikna med året før – som svarar til ein oppgang på 3,2 prosent. Romsdals Budstikke auka med 623 aviser, som svarer til ei auke på 3,5 prosent.

Størst vekst i Giske - størst tilbakegang i Valldal
Avisa Øy-Blikk i Giske hadde størst prosentvis framgang av alle avisene i regionen med ein oppgang på nær 13 prosent.

Også lokalavisa Nyss, som dekker Stranda og Sykkylven, hadde eit solid år med drygt fem prosent auke.

Storfjordnytt som kjem ut i Valldal, hadde størst nedgang i opplaget av avisene på Nordvestlandet med ein tilbakegang på meir enn åtte prosent.

Vestnesavisa hadde også ein betydeleg tilbakegang på meir enn fem prosent.

Auke digitalt - nedgang totalt
Totalopplaget for alle norske aviser går tilbake med 0,5 prosent, viser MBLs tal for andre halvår i 2023.

Det digitale opplaget aukar samtidig med 9,5 prosent. 64 prosent av opplaget her til lands er heildigitalt, med 1,6 millionar digitale abonnement.

– Stadig fleire nordmenn føretrekkjer å få med seg nyheiter digitalt, det ser vi no resultata av. Den digitale transformasjonen går framleis føre seg for fullt hos dei mindre lokalavisene, og fleire ser ut til å lykkast godt med denne overgangen. Regionavisene styrkjer seg både med auka opplag og fleire lesarar i perioden. Tala viser at lokaljournalistikken står sterkt, og at lokal- og regionavisene er ein viktig del av kvardagen til nordmenn, seier MBL-leiar Randi S. Øgrey om tala i ei pressemelding.

Sjå opplaget for avisene på Nordvestlandet under