Startar sju anlegg på tre kontinent på halvanna år

Hexagon Purus som blei skilt ut frå ålesundselskapet Hexagon Composites i 2020, er på veg over i ei ny fase.

Til no har mykje handla om kostnader i milliardklassa og innhenting av kapital. Samtidig er det vekse fram eit industrikonsern som har spissa verksemda mot hydrogen og batteriløysingar for transportsektoren.

– No er vi veldig godt plassert og har tatt dei tunge løfta på investeringssida, fortel administrerande direktør Morten Holum i Hexagon Purus til Nett No.

Sikter mot positiv drift neste år
Nyleg leverte selskapet halvårsrapporten som viste kraftig vekst i inntektene. I løpet av året reknar Holum å auke med kring 50 prosent frå i fjor, som betyr at konsernet vil passere to milliardar i omsetning.

– Veksten skal sørge for å skalere opp volumet - også skal vi bli skikkeleg flinke på produksjonen, legg han til.

For no er tida kome for å tene pengar. Målet som er fortald til investorane er eit positivt ebitda-resultat - driftsoverskot før av- og nedskrivingar – neste år.

Avtaler med store bilprodusentar
Grunnlaget for å kome dit – og skalere opp vidare – ligg i ein rekke avtaler med nokre av verdas største bilprodusentar.

Tidlegare i år fekk selskapet stadfesta ein avtale med Hino Trucks, som er del av Toyota-konsernet - og sikrar inntekter for meir enn 20 milliardar kroner dei neste åra.

Avtalen gjeld å levere ein ny type batterielektrisk lastebil kalla Tern RC8. Dei skal lagast ved ein ny fabrikk i amerikanske Dallas som snart startar produksjonen.

Ford er ein anna kontraktspartnar. Daimler er ein tredje. OEM-ar blir dei store bilprodusentane kalla på businessspråket – som står for Original Equipment Manufacturer.

– Å få kontraktar med store etablerte OEM-ar er superkrevjande og det blir sjekka på alle vis at vi har orden i sysakene og god nok kvalitet på produkta, fortel Holum.

Leverer heile lastebilar
Avtalen med Toyota-selskapet er størst i verdi, men Holum er vel så nøgd med avtalen om å elektrifisere lastebilar for Daimler.

Dessuten er avtalene meir omfattande enn berre utstyrsleveranser. Holum fortel at dei får eit tomt chassis utan drivlinje frå Hino og Daimler. Deretter monterer dei eigne elektriske drivlinjer, og leverer fullt ut elektrifiserte kjøretøy tilbake - inkludert programvare.

– Sjølv om desse selskapa er kjent for å vere mellom det mest krevjande å jobbe med, har vi klart å få kontraktar. Tilsvarande er det på distribusjonssida. Det er snakk om store gigantar, legg Holum til.

Han er tydeleg på at volum er viktig for å klare å tene pengar i bransjen dei har satsa på. Avtalene som er inngått dei siste åra gir også inntekter framover, som ikkje er avhengig av nye utviklingskostnader og investeringar.

– At vi no leverer til desse over tid og med god kvalitet, er heilt nødvendig, seier Holum.

Lagar maritim prototype i Langevåg
Kort sagt lagar Hexagon Purus tankar og system for bruk av hydrogen som energiberar. I tillegg har dei satsa på løysingar for bruk av batteri som energikjelde.

Men å gi ei oversikt over verksemda til Hexagon Purus, er ikkje lenger gjort i ei handvending. I løpet av ei periode på halvanna år er det starta, eller under bygging, ikkje mindre enn sju anlegg over store delar av verda.

Hovudkontoret ligg i Oslo, men framleis har selskapet ein «navlestreng» til Nordvestlandet. I vinter opna Hexagon Purus Maritime kontor ved Devoldfabrikken i Langevåg med ni tilsette.

– Her skal vi lage det første prototypesystemet for den maritime marknaden, seier Holum.

Har opna fabrikkar på løpande band
I Tyskland har selskapet to fabrikkar der det jobbar til saman 350 personar. Dei lagar hydrogensylindere, og sett saman hydrogensystem for distribusjon via tankar.

I Canada har dei ein fabrikk for batteri-modular og -pakkar med kring 100 personar i arbeid. Like mange jobbar i ein sylinderfabrikk ved Maryland på austkysten av USA. Nokre få tilsette er det også ved eit prototype- og servicesenter i California.

Snart opnar også den nemnte fabrikken som skal lage lastebilar for Hino Trucks.

– Her kjem det truleg til å bli arbeid til 50 til 100 personar, seier Holum.

Som om ikkje det var nok, er det planar om å starta ein ny fabrikk med kring 50 tilsette i Kina neste år.

Har investert kring fem milliardar
Det Hexagon Purus-sjefen er mest nøgd med i dag, er at selskapet har klart å halde seg til planen. Det har mellom anna kravd kring fem milliardar i investeringar.

– Vi har fått opp anlegga utan vesentlege forseinkingar og budsjettoverskridingar. Også har vi brukt halvanna til to år på å sikre kontraktar og validere teknologien, legg han til.

Holum roser eigarane for å være kunnskapsrike, og for å tenke langsiktig og industrielt. Han meiner det gir selskapet ein fordel.

– Det har gjort det mogleg for oss å gjere dette, seier han.

Må halde tritt med fleire tidssoner
Å vere administrerande direktør for ei verksemd som går føre seg over store delar av verda, krevst ein innsats utover ein vanleg 8-til-4-jobb.

Holum erkjenner at det både blir mykje reising, tidlegare morgonar og seine kveldar, for å halde tritt med kva som skjer i dei ulike tidssonene.

– Det er ein hektisk kvardag, men det er også utruleg spennande, seier han.