Stiller spørsmål ved bruk av reinsefisk

NPK: I ein ny oversiktsstudie har forskarar analysert studiar som har testa effekten av reinsefisk. Dei finn ikkje gode bevis på at nytten reinsefisken gjer i oppdrettsnæringa veg opp for skaden bruken gjer på reinsefisken.
– Den aukande bruken av reinsefisk, og dei store utfordringane desse artane har med å trivast og overleve i merdane, gjer at det kan stillast spørsmål ved om dette er forsvarleg bruk av dyr, skriv leiar for dyrevelferdsgruppa på Havforskingsinstituttet, forskingssjef Tore S. Kristiansen i ein artikkel på nettsidene til HI.

Ingen robuste bevis

Han skriv vidare at når bruken blir forsvart med nytten reinsefisken gjer i merdane, må effektiviteten og funksjonen reinsefisken har i merdane iallfall vere underbygd av robuste bevis.
Ein studie gjort av forskarar frå Havforskingsinstituttet i samarbeid med utanlandske kollegaer, har så langt ikkje funne robuste bevis.
Forskarane har gått gjennom alle publiserte studiar som er gjort på effekten av reinsefisk. I ein oversiktsstudie har dei systematisk analysert publiserte vitskaplege studiar som har testa effektiviteten til reinsefisken, og dei har funne store hol, skriv .
– Auka velferd for reinsefisken vil heilt sikkert gjere han til ein betre luse-etar, men er også heilt nødvendig for at bruken av reinsefisk skal kunne forsvarast både juridisk og etisk, skriv Kristiansen.

50 millionar reinsefisk

I 2018 vart det brukt om lag 50 millionar reinsefisk. 18 millionar var villfanga og 31 millionar oppdretta.
Den dårlege velferda og høg dødelegheit er ifølge Havforskingsinstituttets risikovurdering ein av dei største utfordringane i norsk havbruk, skriv kystogfjord.no.