Stor kontrakt til Hav-datter

Norwegian Electric Systems har sikra eit oppdrag til ein verdi av kring 200 millionar kroner.

Det kjem fram i ei børsmelding måndag.

Arbeidet gjeld utstyrsleveranser til verftet Havyard Leirvik, og er på området «energy design and smart control systems», heiter det i meldinga. Hav Group opplyser at dei kjem med fleire detaljar om avtalen på eit seinare tidspunkt.

Opptur på børsen
Hav-aksjen skaut opp på børsen etter nyheita kom. Ved 10-tida måndag var kurs opp nær 8,7 prosent til 9,76 kroner.

Det verdsett selskapet til 341 millionar kroner.

Tidlegare i år gjekk kursen opp frå kring 9,5 til 12,55 kroner i januar månad. Etterpå har den falle og var førre veke under ni kroner.

Skal levere til nyskapande Fjord1-ferjer
Også i mars melde Hav Group om ein avtale med det Tersan-eigde verftet.

Det gjaldt arbeid på dei nye automatiserte ferjene Fjord1 skal sette inn på Lavik-Oppedal-sambandet. Då opplyste konsernet at dei ville indikere totaleffekten for ferjeoppdraga gir på ordrereserven, når alle relevante avtalar var gjort offentleg.