Tilset folk på løpande band

Alle pilar peikar oppover for pizzaproduksjonen til Orkla Foods i Stranda.

Priskrig på Grandiosa hos butikkjedene og avgjerda om å samle all pizzalaginga på Svemorka er med å gjere at framtida ser lys ut for hjørnesteinsbedrifta.

Resultatet er fleire arbeidsplassar og hektiske dagar for fabrikksjef Svein Urke.

– Vi har nettopp rekruttert 20 nye medarbeidarar etter at vi gjekk ut å søkte etter folk. Vi fekk god respons, seier Urke til Nett No om den siste auken i arbeidsstokken.

Dei nytilsette gjer at produksjonen ved fabrikken på Sløgstad ved Stranda sentrum igjen er sett i gong for fullt.

Treng auka kapasitet for ombygging
Bakgrunnen er at Orkla-konsernet har bestemt seg for å samle all produksjon av pizza på det store Svemorka-anlegget utanfor Stranda sentrum.

– Når vi skal samle all produksjonen i éin fabrikk, så må vi gjere ein del ombyggingar. Då treng vi meir kapasitet, fortel Urke.

Det var i april det blei kjent at Orkla Foods hadde teke avgjerda om samlokaliseringa. Når arbeidet er ferdig, vil det være slutt på pizzaproduksjon både på Sløgstad og ved Sem utanfor Tønsberg.

Har nær 200 i arbeid
Til saman har Orkla no nærare 200 personar i arbeid i Stranda som skal sørge for nye forsyningar av pizzaer til heile Norge. Det er ei auke på nær 50 nye i løpet av det siste året.

– Her er det pizzalaging for alle penga, seier Urke medan han viser Nett No ein kjapp runde gjennom fabrikken.

Framover vil det bli gjort om på produksjonsband og flytta om på maskinar, for å få mest mogleg effektiv produksjon.

Nøyaktig korleis, held fabrikksjefen for seg sjølv - og han vil heller ikkje at det blir fotografert «kvar som helst» i produksjonen. Det er ikkje verdt å hjelpe eventuelle konkurrentar til å få gode idear.

– Har vore ei eventyrleg utvikling
Svemorka-fabrikken ble satt i drift i 1997, og det er allereie investert betydelege beløp for å utvikle anlegget de siste årene. No blir det investert nye 175 millionar kroner for å samle produksjonen.

Under Teknologifestivalen i Sykkylven nyleg fortalde teamleder teknisk Andreas Lillevold ved Orkla Stranda om den teknologiske utviklinga sidan oppstarten av pizzafabrikken på 1970-talet.

I starten blei det laga fem pizza i minuttet, som dei tilsette skyva manuelt bortover på eit produksjonsbord.

– Det har vore ei eventyrleg utvikling. Det var mykje manuelt den gongen eg starta også, fortel fabrikksjef Urke.

Produktutvikling med unge i bygda
I tillegg til at deltakarane frå festivalen fekk omvisingar ved lokale bedrifter, var det eige opplegg for dei yngste i bygda.

Det har fabrikksjef Svein Urke stor sans for. Også ved pizzafabrikken er dei bevisste på å gjere ungdommen merksame på kva som rører seg i arbeidslivet i nærmiljøet deira.

– Vi har mellom anna eit opplegg for vidaregåande og ungdomsskulen på fabrikken med produktutvikling ein gong i året, seier Urke.

Då kjem dei unge med forslag til nye pizzatypar, med full presentasjon og idear til marknadsføring. Bedrifta stiller med dommarpanel som prøvesmakar og stemmer på sine favorittar.

– Dei lagar pizzaen og seljer den inn før vi prøvesmakar. Dei er verkeleg flinke og kreative, legg han til.