Tok eit oppgjer med mannleg maritim dominans

- Det er paradoksalt at vi i 2021 framleis snakkar om verdiane av mangfald.

- Det er trist at det framleis er eit tema å snakke om at jenter og kvinner må ha same mulegheiter for å lukkast i den maritime næringa som menn, men faktum er at vi sidan 1950 eigentleg ikkje har kome så langt.

Det sa Siv Remøy-Vangen under Fosnavågkonferansen torsdag, ein fysisk konferanse for 100, dei aller fleste menn.

Fekk pris
Remøy-Vangen er frå Remøya, men er no adm. dir. i Maritime Bergen, ein organisasjon med 170 bedrifter under paraplyen. Nyleg fekk ho tildelt Leadership Award 2021 av Wista Norge, ein pris Wista (Women’s Internatinal Shipping & Trading Association) deler ut årleg.

Remøy-Vangen fekk prisen for sitt viktige arbeid for å styrke den maritime industrien med eit spesielt fokus på det potensialet kvinner representerer.

Få kvinner på toppen
Ho opplyste at Maritime Bergen har jobba mykje med mangfald, spesielt etter 2009, då medlemsbedriftene såg at det ville verte omfattande generasjonsskifte dei neste ti åra, og der ein samstundes såg at det var vanskeleg å rekruttere sjøfolk til stillingar på land.

- Då vi starta arbeidet hadde vi 9 prosent kvinner i vårt nedslagsfelt. No har vi over 30 prosent. Det er bra, men det er framleis ein stor jobb å gjere.

- Blant anna manglar det mange kvinner i tekniske stillingar og i leiinga på topp-plan.

Omfattande maritim bakgrunn
Remøy-Vangen har sjølv ein allsidig maritim bakgrunn etter at ho først mønstra på som 16-åringen på fabrikkskipet Hopen.

Det vart eit nokså kort opphald på sjøen, men ho heldt fram den maritime karriæren på land. Ho har ein bachelor i «International Business Management» frå BI, med to års utveksling i Singapore og Malaysia, og i 2017 fullførte ho i tillegg ein Executive MBA frå BI med spesialisering innanfor Offshore og Maritim.

Ho har vore visepresident for prosjektleiing hos TTS, charterer/skipsmeklar hos Odfjell Tankers og var ein av grunnleggjarane av Youngship Oslo.

Sjefen trudde ho ville vere heime
Då ho starta i shipping i Oslo kom ho til eit veldig mannsdominert miljø, men såg seg sjølv som ein av gutane, men det skulle det verte ein brå slutt på.

- Eg tenkte ikkje at det var eit problem at eg var kvinne i den maritime næringa, og trudde at mine kvalifikasjonar var like gode som kvalifikasjonane til mine mannlege kollegaer.

- Men dette endra seg etter min første fødselspermisjon. Då sa sjefen min at det ikkje vart lagt inn reiseaktivitet på meg det året, fordi han rekna med at eg ville vere heime og prioritere familien. Derimot var det lagt inn stor reiseaktivitet på fleire av mine mannlege kollegaer, som hadde fått barn samstundes som meg.

Kjem krav om mangfald
Remøy-Vangen viste til at ein no stod overfor vår tids største utfordring, som er å halvere utsleppa av klimagassar før 2050 og verte klimanøytrale. Ho meinte at i ein slik situasjon var det ekstremt viktig å satse på mangfald, om ein skal lukkast.

Ho hadde klare råd til salen.

- Dokke vert møtte med aukande krav for å dokumentere mangfald. Om dokke er avhengige av å tiltrekke dokke meir kapital, eller er avhengige av gode partnerar, bør dokke tenke mangfald når det skal setjast saman team.

- Fram til 2050 skal vi skape mange nye grøne løysingar og mange nye grøne jobbar. Då må vi setje saman dei rette teama som tenker nytt og utfordrar kvarandre. Då må vi tenke mangfald.

Betre profitt
Remøy-Vangen serverte også ei gulrot, spesielt retta mot aktørane i lokalsamfunnet, som ho sa.

- Det dreier seg om profitt. Forsking viser at dersom du klarer å setje saman mangfaldige team, vil du få 36 prosent betre avkastning enn bedrifter innanfor same segment.