Trekk fram bedrifter som har lukkast med rekruttering

Tilgang på arbeidskraft var mellom fleire tema på årskonferansen til NHO Møre og Romsdal torsdag. 

Foran ein fullsett sal fortalde regiondirektør Lene Trude Solheim i NHO og fylkesdirektør Stein Veland i Møre og Romsdal om eit samarbeid kalla «Arbeidskraftløftet». 

– Det å ha arbeid betyr så mykje for både den enkelte og for samfunnet, sa Veland innleiingsvis. 

Prosjektet blei lansert i fjor haust og målet er å få fleire inn i arbeidslivet og auke kompetansenivået i befolkninga. 

Tilgang på folk har vore ei utfordring i fleire år, og i fjor var det 6 av 10 bedrifter i regionen som sleit med finne den rette kompetansen, ifølgje ei NHO-undersøking.

Eksempel frå fleire enn 30 bedrifter 
Gjennom prosjektet skal bedrifter mellom anna få tilgang til tips korleis dei kan jobbe med å både rekruttere og behalde tilsette. 

I samarbeidet har Nav og NHO knytt til seg kring 30 bedrifter som har kome med gode eksempel for korleis dei har lukkast. 

– Vi håpar dette skal motivere og inspirere andre å vise fram noko av den verktøykassa som finst, sa Solheim.

Eit eksempel er Nordea som tok i bruk speed-intervju i si rekruttering. Slik fann dei nye tilsette som truleg ville fått sortert ut CV-en i ein ordinær prosess. 

Mentor-tilskot er eit anna verktøy som er nytta fleire plassar, mellom anna hos Kongsberg Maritime i Ulsteinvik. Dei tilsette fleire unge som hadde vore utanfor arbeidslivet til å digitalisere arkivet sitt. 

– Kanskje må dei senke krava 
Nav-direktøren meiner det skjer mykje godt rekrutteringsarbeid i bedriftene, og at mange er kreative i prosessen. Samtidig blir ein del tvunge til å tenke alternativt.

– Kanskje må dei senke krava og samtidig bruke litt meir ressursar på internopplæring. Då kjem ein ofte i mål, sa Veland.

Bakteppe for prosjektet er ei aldrande befolkning og at mange i arbeidsfør alder er utan jobb. 

På konferansen teikna Nav sin statistikksjef Ulf Andersen i Nav opp eit dystert bilde for tilgangen på arbeidskraft i regionen i framtida. Samtidig som han peika på det er mogleg å løyse.