Tøft for besøksgard i fjor

Rekneskapen til Hakallegarden i Vanylven viser at fjoråret blei ein nedtur.

Vanylven-bedrifta fekk kontantstøtte til faste utgifter på nærare to hundre tusen. Men dei tapte inntektene som følgje av smitteverntiltak i samband med koronapandemien, utgjorde langt meir, viser årsrapporten.

Etter at omsetninga ved besøksgarden i fleire år har svinga mellom fire-fem millionar, stoppa inntektene på knappe 2,2 millionar i fjor. Rekneskapen enda også med det største underskotet til no for firmaet (sjå tabell under)

Gode erfaringar med bookingsystem
Då NETT NO snakka med Aina Moldskred Krakset ved Hakallegarden tidlegare i år, fortalde ho at fjoråret også hadde sine oppturar.

Omsetning var betre i juli månad med færre folk innafor dørene. Dei hausta også erfaringar med nytt bookingsystem, som gjer at dei kan planlegge drifta betre.

– Det blir også kjekkare for gjestane når vi kan ta oss skikkeleg av dei, fortalde Krakset til NETT NO då.

Framleis solid eigenkapital
Eigenkapitalen i selskapet var ved utløpet av 2020 framleis på solide 6,1 millionar. Samla gjeld er kring 1,8 millionar.

Aina Moldskred Krakset driv besøk- og opplevingsgarden, saman med mannen Olav, som eig aksjane i selskapet. I fjor sysselsette familiefirmaet to årsverk.