Vil ha nye sjøkart langs heile kysten

- Dersom Norge skal lukkast med sine ambisiøse planar for havbruk, trengst det langt betre kart enn det som er tilgjengeleg i dag.
Dette seier direktør Evert Flier i Kartverket sjø.

Utvida ansvar

Han rosar fylkeskommunen og dei fem kommunane på søre Sunnmøre som har delfinansiert høgoppløyselege sjøkart på strekninga frå Vanylvsgapet nord for Stad til Breisundet sør for Ålesund og Giske.

Les her:

- Kommunane har no fått utvida sitt arealplanområde til å gjelde ei nautisk mil utanfor grunnlina. Dei nye sjøkarta er viktige for at kommunane skal kunne leggje til rette for å ta heile havromet i bruk.
Flier meiner dette er spesielt viktig i ei tid der Norge gradvis er på veg vekk frå oljealderen.
- Det er i havromet den store veksten skal kome. Då må vi også ha langt betre kunnskap enn vi har i dag.

Superlokalitetar

Flier viser spesielt til mulegheitene dei detaljrike sjøkarta gir for å identifisere nye superlokalitetar for havbruk.
- Dette bør vere plassar der det er god gjennomstrøyming, men samstundes ikkje så mykje straum at føda forsvinn. Samstundes må dei ikkje leggjast nær område som er viktig for andre fiskeslag.
Dei nye sjøkarta viser i detalj havbotnen, også kvar det er stein, grus, sand eller leire.
- Dette er også viktig for å identisere gode ankringsplassar og naudhamner, seier Flier.

Pilotprosjekt

Han håpar at andre vil ta etter pilotprosjektet på søre Sunnmøre.
- Slike sjøkart bør kome langs heile kysten, og så får vi sjå kva område som vert opna for denne type detaljkartlegging.
Dei nye høgoppløyselege sjøkarta vert ope tilgjengelege for alle, og kan finnast på internett under heimesidene etil NGU (Norges Geologiske Undersøkingar) og Mareano. Her finst det ei rekkje ulike val for kva informasjon ein vil ha ut frå karta.