Kriseråka bransje med betra lønsemd

ANALYSE

Smittervernrestriksjonar som blir endra på kort varsel, stengde grenser, avlyste julebord og konferanser, krisepakkar frå staten og hektiske sommarsesongar . Dette har prega omtalen av hotellbransjen sidan koronaviruset kom tidleg i 2020.

Difor er det nok overraskande å sjå at hotellbransjen på Nordvestlandet samla sett hadde betre lønsemd i 2020 enn i 2019, som det går fram av tabellen i slutten av denne artikkelen.

Det er ingen tvil om at bedriftsleiarane og -eigarane har hatt bekymringar i rikelege mengder, og kø av problem som måtte løysast, men for bedriftene vart 2020 eit brukbart år målt etter storleiken på resultatet før skatt.

I gjennomsnitt fall driftsinntektene til hotella med 20 prosent frå 2019 til 2020. Koronakrisa er dermed lett å lese ut av av hotellrekneskapa.

Berre seks av 37 hotellselskap i NETT NO si oversikt auka driftsinntektene i fjor, og for dei aller verst råka var det snakk om ei halvering av driftsinntektene eller meir.

Likevel dreiv bransjen samla sett meir lønsamt i fjor enn i 2019. I og med at inntektene fall er det kostnadskutt - saman med koronastøttetiltaka - som er forklaringa.

Store og raske kostnadskutt i hotellbransjen betyr nedbemanning. Hotella har permittert, og tildels lenge. Er du permittert får du pengar, men berre ein andel av det du hadde i løn.

Det er dermed både snakk om eit økonomisk tap for den einskilde tilsette, i tillegg til uvissa om og eventuelt når du får jobben tilbake.

Mange har forlete bransjen til fordel for andre jobbar, eller er utanlandsk sesongarbeidskraft som framleis har vanskar med å kome til Noreg. Når storparten av smitteverntiltaka vart oppheva tidlegare i haust fekk både hotell- og restaurantbransjen merke at det er blitt tyngre å rekruttere.

– Vi slit med å få tak i folk innan dei fleste faga på huset, og har få søkjarar til nye stillingar. Det gjeld både servitørar, kokkar, resepsjonistar og reinhaldarer, sa administrerande direktør Sven Erik Moe ved Scandic Parken Hotel til NETT NO i september i år.

Sjølv om gjennomsnittstala viser betring i lønsemda i bransjen viser tala til kvart einskild selskap ein bransje med store stor skilnadar.

Heile 19 av i alt 37 selskap gjekk med underskot i 2020, mot 10 hotell med minus i 2019.

18 selskap hadde overskot, men berre sju av dei hadde eit resultat før skatt i høve til driftsinntektene (resultatmargin) på over 10 prosent. På minussida var det 11 selskap som hadde ein negativ resultatmargin på 10 prosent eller meir.