Takkar Stortinget og regjeringa etter knallår

Hotel Alexandra-sjef og storaksjonær Richard Grov såg fanden på veggen då koronapandemien kom i mars 2020 og hotellet måtte stenge av smittevernomsyn.

Men snart lysna det, og 2020 blei eitt av dei mest lønsame åra Hotel Alexandra-konsernet har hatt (sjå tabell).

Den viktigaste forklaringa på at det gjekk så bra er alle dei ulike støttetiltaka og letta i vilkår for å drive selskapet som kom for å gjere det lettare for næringslivet gjennom koronakrisa. Konsernet ville gått i pluss også utan denne hjelpa, men det ville blitt eit lite overskot, ifølgje Grov.

Han understrekar fleire gongar i samtalen med NETT NO takksemd til styresmaktene.

- Vi er veldig takksame for at Stortinget og regjeringa har hjelpt oss gjennom denne krisa, seier Grov.

Betre vilkår
Grov listar opp tiltaka som gjorde det økonomisk lettare etter at koronapandemien kom:

• Høve til å ta opp statsgaranterte lån for å sikre likviditet.
• Endra permitteringsreglar reduserte tida bedriftene måtte dekke utbetalinga til dei permitterte.
• Kontantstøtte til bedrifter med stort inntektsfall.
• Redusert moms-sats for reiselivsbransjen fr 12 til seks prosent.

Alt dette snudde raskt svartsyn til optimisme, og vilje til å satse, ifølgje Grov.

Minst like bra i år
Norske gjestar gjorde sommarsesongen svært god i 2020, og marknaden var bra godt ut i oktober, før innstrammingar i smitteverntiltaka.

Den innstramminga gjorde at det var liten aktivitet både i slutten av 2020 og i starten av 2021.

Men i mai i år tok marknaden seg kraftig opp. Nett no er driftsinntektene så langt i år nesten på nivå med same periode i 2019, og Grov anslår at lønsemda i år blir betre enn i fjor.

- Eg har ein god magefølelse av at vi kjem ut betre enn i fjor, seier han.

To hotell og gondol
Hotel Alexandra-konsernet omfattar Hotel Alexandra og sesonghotellet Hotel Loenfjord, gondolselskapet Loen Skylift, restaurantselskapet Hoven Restaurant og aktivitetsselskapet Loen Active, i tillegg til eit eigedomsselskap.

Richard Grov og familiemedlemer er største aksjonær gjennom selskapet Grov as, som eig 34,9 prosent av Hotel Alexandra-konsernet.