Flat utvikling i BNP

Utanom fisket auka BNP Fastlands-Noreg med 0,2 prosent.

Tala frå nasjonalrekneskapen viser at bruttonasjonalprodukt for Fastlands-Noreg var på same nivå i oktober som i september, melder Statistisk sentralbyrå.

– Fisket og varehandelen trekte aktiviteten ned, medan delar av industrien og ei rekkje tenesteytande næringar trekte aktiviteten opp. Totalt vart det ei flat utvikling i oktober, seier seksjonssjef for nasjonalrekneskapen Pål Sletten i SSB.

Han seier månadstala svingar ein del, og det er derfor formålstenleg å vurdere utviklinga over tremånadersperiodar. Her viser tala vekst på 1,1 prosent i BNP Fastlands-Noreg frå mai-juli til august-oktober.

– Ser ein på utviklinga i BNP Fastlands-Noreg over dei siste tremånadersperiodane, har det vore forholdsvis høg vekst, seier Sletten.

BNP-tala blir trekte ned av fallande varehandel, fiske og fangst og fallande bustadinvesteringar. Tala blir trekte opp av vekst i tenestenæringane og auka vare- og tenestekonsum i hushalda.