Jobbar i fare på grunn av straumprisar

Farane ved å bli stadig meir kopla til ein ustabil kraftmarknad i Europa byrjar å merkast, meiner Christian Anton Smedshaug i Agri Analyse.

Høge straumprisar skaper stor uvisse om framtida til kraftkrevjande industri i Noreg, skriv Klassekampen.

Christian Anton Smedshaug, analytikar og dagleg leiar i Agri Analyse , seier til Klassekampen at han trur norske industriarbeidsplassar er i stor fare viss ikkje ei ny regjering viser kraftpolitisk klokskap.

– Med dei nye kablane er eksportkapasiteten seks gonger høgare enn det vi har eksportert det siste tiåret. Vi har gått frå utveksling til eksportstrategi. Det vil gi store prisutslag og ustabile prisar, seier han.

Han meiner Noregs naturgitte fordelar er i ferd med å gå tapt i eit europeisk kraftsystem i kronisk ubalanse.

– Det regulerbare og fornybare kraftsystemet vårt er ein unik ressurs. Det bør vere den fremste prioriteten til politikarane å ta vare på han. Det er juvelen i den norske økonomien, seier Smedshaug.

Smedshaug peikar på at om eit kraftsystem skal vere stabilt, trengst både såkalla balansekraft – kraft som kan regulerast raskt opp og ned – og grunnlast. Grunnlast er konstant og føreseieleg produksjon av straum. I Europa har grunnlasta i stor grad komme frå kolkraft og atomkraftverk, som no blir avvikla og erstatta av ustabil vind- og solkraft.