Kongeparet kjem til bryllaupsfesten på Union

(NPK-NTB): Kong Harald, dronning Sonja, kronprins Haakon og kronprinsesse Mette-Marit er blant dei frå Kongehuset som deltek i Märtha Louise og Durek Verretts bryllaup.

I tillegg deltek også prinsesse Ingrid Alexandra, prins Sverre Magnus og prinsesse Astrid, skriv Slottet i ei pressemelding.

Men den eldste sonen til kronprinsessa, Marius Borg Høiby, skal ikkje delta i bryllaupet, opplyser Slottet til NRK. Han er sikta etter ei valdshending tidlegare i august, men etter det rikskringkastaren erfarer, vart avgjerda om at Høiby ikkje skal delta i bryllaupet teke før den tid.

– Delar av familien skal også vere til stades under arrangementet i Ålesund torsdag 29. august, skriv Slottet, utan å spesifisere kven.

– Kongefamilien ser fram til å vere med i prinsesse Märtha Louise og Durek Verretts bryllaup som gjestar, føyer dei til.

Kongeskipet Norge blir nytta som bustad under bryllaupet.

Prinsesse Märtha Louise og Durek Verrett skal gifte seg laurdag 31. august på Vinjevollen i Geiranger. Gjestelista i sin heilskap blir ikkje delt med offentlegheita, ettersom bryllaupet ifølgje paret er privat.

Feiringa varer i fleire dagar, og byrjar allereie torsdag kveld i Ålesund. NRK erfarer at kongeparet ikkje skal vere med på arrangementet torsdag, men dette er ikkje stadfesta.

Dagen etter, fredag 30. august, reiser brudeparet saman med gjestene i båt frå Ålesund til Geiranger.

Vigslinga skjer eit steinkast unna Hotel Union, der bryllaupsfesten finn stad. Hotellet vart bygd i 1891 og har seinare vorte ombygd og utvida.

Biletrettane til bryllaupet er selde til det britiske gigantmagasinet «Hello!», noko som har vekt sterke reaksjonar. All anna presse blir stengd ute frå vigslinga og festane.

Medlemmene i kongehuset har reservert seg frå å bli teke bilete av og bli filma av media med eksklusive avtalar, i dei tilfella der pressa elles ikkje har tilgang.

(©NPK)