Den mørke hausten i bustadmarknaden held fram, ifølgje meklarkjeder. No ventar fleire ein sterk prisnedgang.
Til jul kan heile prisveksten i 2022 vere borte, trur meklartopp.
– Oppdragsinngangen har vore høg i haust, og det er no mange objekt til sals, seier Hedda Ulvness, sjef i meklarkjeda Eie, til Dagens Næringsliv.
– Det pressar ned salsprisane. Vi får selt, men det tek ofte relativt lang tid, seier Ulvness.
Bustadprisane fall mykje i både september og oktober, og nedgangen er ikkje over. Salstala til Eie indikerer framleis størst prisnedgang i hovudstaden.
– Eg ventar ein relativt sterk prisnedgang i november òg, seier Eie-sjefen.
Frå januar til august vart bustadar her i landet i snitt 9,1 prosent dyrare.
Grethe Meier, administrerande direktør i Privatmegleren, seier ho meiner bustadprisane truleg vil falle rundt 10 prosent frå toppen i august fram til botnen er nådd.
Bustadprisstatistikken for november kjem måndag.
Publisert: 01.12.2022 07:37
Sist oppdatert: 01.12.2022 07:38
