Rekordomsetning for Stryn-hotell

Loen-konsernet med Hotel Alexandra sette ny rekord i fjor med ei samla omsetning på 265,5 millionar kroner, ifølgje avisa Fjordingen.

Hotell og reiselivskonsernet i Stryn består i tillegg til hotellet, av Loen Skylift og Loen Active.

Resultat før skatt enda på drygt 19 millionar – som er nær ei halvering frå året før.

Hotelldirektør og eigar Richard Grov fortel til avisa at årsaka til at resultatet vart nær halvert, var at dei nytta meir enn 37 millionar kroner av eigen kapital til å pusse opp og gjere andre investeringar.

Gondolbana Loen Skylift sette solid besøksrekord med 125.400 reisande, som førte til rekordbra omsetning og overskot også i det selskapet.

- Alle prognoser tyder på at 2023 endar med ny, solid besøksrekord, seier Grov til avisa.

Hotell og reiselivskonsernet har kring 200 årsverk i arbeid.