Ser mot nye fiskemarknader

(NPK): Noregs sjømatråd har tilsett to prosjektleiarar som skal finne nye marknader for norsk sjømat i Afrika og India.
Trond Kostveit (54) får Vest- og Sentral-Afrika som sitt ansvarsområde, medan Yogi Shergill (54) skal finne nye marknader for norsk sjømat i den nest mest folkerike nasjonen i verda, India. Det skriv Fiskeribladet Fiskaren.
Kostveit har 25 års arbeidserfaring i Afrika. I stort sett heile sitt yrkesaktive liv har han hatt ulike stillingar der han har jobba mot ulike afrikanske land. Han snakkar norsk, engelsk og fransk.
Shergill er opphavleg frå India, men har budd i Noreg sidan 1974. Han snakkar norsk, engelsk, panjabi og hindi. Han har i fleire år hatt ulike leiarstillingar innan sal og marknadsføring og har jobba med mange marknader, blant desse India.
Noregs sjømatråd har stor tru på prosjekta i India og Afrika.
– Prosjekta skal gi sjømatnæringa vital marknadsinnsikt, og gi Sjømatrådet eit godt grunnlag for å opne nye marknader saman med norske sjømateksportørar. Vidare har prosjekta som formål å greie ut korleis Sjømatrådet best kan organisere aktivitetar og nærvær i landa i framtida, seier Ingelill Jacobsen, landsansvarleg for nye marknader i Noregs sjømatråd. (©NPK)