Tosifra ekstra-milliardar til Forsvaret

(NPK-NTB): Finansminister Trygve Slagsvold Vedum seier det vil komme eit tosifra tal med ekstra milliardar til Forsvaret i ny forsvarsplan, som kjem rett etter påske.

Bakgrunnen er frykt for tryggingssituasjonen i Europa, seier Vedum til NRK.

– Her må det skje ei kraftfull opptrapping. Det må vere meir til hæren, meir til heimevernet, vi må sikre luftforsvaret og sjøforsvaret, seier Vedum til rikskringkastaren.

– Vi legg fram langtidsplanen vår som kjem til å vere den første planen der Natos 2-prosentmål er inne, legg han til.

Vedums sjef, statsminister Jonas Gahr Støre, kom med ein liknande uttale til NTB under tryggingskonferansen i München tidlegare denne månaden.

Då varsla Støre at regjeringa ville leggje fram ein langtidsplan som sikrar dei største løyvingane til Forsvaret etter andre verdskrigen.

– Noreg har behov for å styrkje forsvaret sitt. Vi har styrkt det med 40 prosent sidan vi kom i regjering, men no må vi gjere eit større grep for fleire år framover, sa Støre.

(©NPK)