Verftskommunar ber om møte om forsvarskontraktar

(NPK): 11 verftskommunar ber regjeringa gi kontraktane til norske verft når sjøforsvaret skal kjøpa 28 nye fartøy.

Langtidsplanen for Forsvaret (2025–2036) legg opp til bygging av 10 havgåande og 18 kystnære standardfartøy for det norske Forsvaret.

Ifølge ein analyse frå Menon Economics kan bygginga generere 85 milliardar kroner i verdiskaping og 23.500 årsverk på tvers av landet.

– Det er heilt avgjerande at store nasjonale investeringar også kjem distrikta til gode, seier ordførar i Kinn, Bengt Solheim-Olsen, til Firdaposten.

Saman med 10 andre verftskommunar har dei bedt om eit møte med Forsvarsminister Tore O. Sandvik (Ap), for å understreke kor viktig det er at regjeringa satsar på norske verft når kontraktane skal lysast ut.

(©NPK)