Nye skip til forsvaret: – Skulle gjerne sett at dette gjekk raskare

Nyleg kom dei første anbodsdokumenta for Forsvaret sine innkjøp av standardiserte fartøy. 

Det er eit politisk mål at mest mogleg av skipa skal byggjast i Norge, noko som kan gi rekordstore oppdrag for den maritime klynga på Nordvestlandet. 

– Vi skulle gjerne sett at dette hadde gått raskare, og vi er utolmodige av oss, seier styreleiar Eivind Reiten i Kongsberg Gruppen om prosessen. 

– Samtidig må eg seie at vi har god kommunikasjon med Forsvaret og vi har respekt for at dette er veldig store avgjerder for deira del. Vi vil ikkje bagatellisere at ting tar tid, og er i den utolmodige enden av det tauet der, held styreleiaren fram. 

– Skal ha tillit til at vi levere
Kongsberg-styreleiaren meiner det viktigaste er at det blir lagt ein tidsplan som er til å stole på, etter at avgjerda er teke. 

– Forsvaret skal ha tillit til at vi leverer og det har vi ein lang historikk for å gjere. Men vi kan ikkje putte på dei store ressursane før det er  gjort eit konseptval som vi veit kva er for noko, legg Reiten til.                            

Kongsberg Maritime er mellom dei som har vore tidleg på tilbodssida. Allereie for fem år sidan la dei Vanguard-designet på bordet, som eit alternativ for å bygge standardiserte fartøy.

Dei har også vore med på eit prosjekt der fleire leverandørar gjekk saman om å jobbe med eit pilotfartøy. 

Har frist til 20. mai
Til saman er det snakk om 28 sokalla standardiserte fartøy av ulik storleik. I utgangspunktet er det snakk om 10 større skip som skal vere havgåande,, og 18 mindre fartøy med kystnær plattform. 

I marknadsundersøkinga som markerte starten på anbodsprosessen blir leverandørar bedne om å fortelje kort kva dei kan tilby. Fristen er sett til 20. mai. 

Forsvarsmateriell erkjenner sjølv at fristen var kort – men påpeikar at dei ikkje er ute etter utfyllande svar i denne omgang. 

Trur det vil vere moglegheiter for mange
Vard-sjef Cathrine K. Marti meiner det vil vere moglegheiter for mange i klynga til å sikre seg oppdrag. Ho har ingenting å utsette på fristen neste veke.

– I Vard har vi arbeida godt frem mot denne prosessen og det er avgrensa kva dei spør om i denne marknadsundersøkinga, seier ho. 

Konsernet har mykje erfaring med å bygge skip til Forsvaret, og har mellom anna levert dei tre siste kystvaktskipa. 

Vard vil i tillegg til dei standardiserte fartøya, vere med å bygge dei nye fregattane som forsvaret også skal investere i. 

– Godt rusta og posisjonert
Ulstein Group aktar også å vere med på konkurransen om å bygge skip til forsvaret. 

Konsernet har som kjent inngått ein intensjonsavtale med tyske Thyssenkrupp Marine Systems om å bygge av fregattar. I tillegg vil dei vere med å kjempe om kontraktane for standardiserte fartøy.

– Ulstein Group er godt rusta og posisjonert til å møte framtidige behov innan både forsvarssektoren og den sivile sektoren, seier administrerande direktør Lars Lühr Olsen ved Ulstein Verft til Nett No.

Han fortel til Nett No at dei ser på fristen for å levere til marknadsundersøkinga som mogleg å gjennomføre. 

Ventar på klarsignal til forprosjekt
Stortinget ga grønt lys for standardiserte fartøy i fjor vår. Det er ikkje kjent kva tid ei avgjerd bli teke, men målet er at dei første skipa skal bli levert i 2028. 

Per no ventar Forsvarsmateriell på klarsignal frå Forsvarsdepartementet for å starte forprosjektet, fekk Nett No opplyst førre veke.

GCE Blue Maritime opplevde tysdag rekordstor interesse for sitt forsvar- og beredskapsseminar. 

Onsdag blir den historiske satsinga på nye skip til Forsvaret også tema når ein rekke aktørar møtes på Norsk Maritimt Kompetansesenter i Ålesund i regi av Maritimt Forum Nordvest. Då opnar også Kongsberg Maritime sitt nye sjømilitære kontor same plass.