– Skjønar utfordringane til dei små og mellomstore

– Vi opplever at kommunikasjonen med forsvaret er god, men eg skjønar utfordringane til dei små og mellomstore bedriftene, seier Arild Skoge i Kongsberg Defence & Aerospace. 

Han jobbar med maritime forsvarsløysingar i Kongsberg-verksemda, og har vore involvert i utviklinga av deira Vanguard-konsept i fleire år. 

Bakgrunnen for spørsmålet er eit hjartesukk frå Maritime Partner-sjef Torstein Heggstad.

Hjartesukk frå Maritime Partner-sjef
Under eit seminar i Ålesund i april fortalde han at dei opplevde at prosessen i for stor grad var gjort fråkopla næringa. 

I møte med forsvarsmarknaden opplevde båtbyggjarane gjerne at juss og byråkratiske reglar fekk størst merksemd. 

I staden for å samarbeide seg fram til dei beste løysingane – som dei er vande med i sivile oppdrag, putta dei forslag inn i det Heggstad omtala som «eit svart hol» - der dei får eit ja, eller nei tilbake. 

Heggstad fortalde om det same i podcasten Podium: 

Dei første anbodsdokumenta på bordet
– Eg skjønar dei mange små bedriftene som til no har opplevd at dei ikkje får vite noko, og at alt er så hemmeleg, seier Skoge i Kongsberg om frustrasjonen. 

Etter at Maritime Partner-sjefen kom med sitt hjartesukk under seminaret i Ålesund, har prosessen også kome eit steg vidare. 

For to veker sidan kom dei første anbodsdokumenta på bordet i form av ein marknadsundersøking. Verksemdene som vil vere med hadde frist til tysdag med å skissere kva dei kan tilby. 

Det meiner Skoge var eit godt – og nødvendig skritt. 

– Eg trur den uroa hos desse verksemdene vil roe seg når vi kjem i gong for alvor, og vi kjem i dialog, seier han.

Mål om ei avgjerd i løpet av året
Det er ikkje sagt kva tid det kjem ei avgjerd om kva for skip det norske forsvaret vil satse på. Etter det Nett No kjenner til, er det likevel eit mål om å kome i mål i løpet av året. 

I førre veke fekk Nett No opplyst frå Forsvarsmateriell at dei venta på eit klarsignal frå Forsvarsdepartementet om å sette i gong forprosjektet.

Skoge håpar at prosessen gir rom for at den maritime klynge kan vise kva dei er best på – maritim nyskaping. 

– Jo lengre tid vi ventar med å ta ei avgjerd, jo mindre tid blir det igjen til innovasjon, minner han om. 

Meiner Kongsberg bør ta ansvar
Arild Skoge i Kongsberg trur óg skilnaden i storleiken på bedriftene kan ha mykje å seie for skilnaden i opplevingar. 

Samtidig meiner han konsernet bør ta på seg eit ansvar ovanfor dei mindre verksemdene i den maritime industrien.

– Som ein stor aktør, så ligg det på eit vis i genane til Kongsberg å vere ein slags formidlingskanal, seier han. 

Kongsberg har inngått eit samarbeid med fem verft og fleire leverandørar i kampen om å sikre sin del av oppdraga. 

Forsvaret tek ikkje avgjerder på detaljnivå
Skoge understrekar óg at det ikkje er forsvaret åleine som vil ta avgjerder ned på detaljnivå.

– Det er totalleverandøren og verfta som sjekkar dei ulike komponentane, så går dei til forsvaret og anbefaler, seier han.

Bygginga av tre kystvaktskip var det siste store oppdraget norsk verftsindustri hadde for det norske sjøforsvaret. Vard Langsten var byggeverft – men om bord var det leveransar frå ein lang rekke bedrifter i den maritime klynga.