Vil lette tilgangen på sesongarbeidarar

(NPK-NTB): Problem med å få tak i utanlandsk arbeidskraft gjer at regjeringa forenklar kombinasjonen av dagpengar og sesongarbeid i fiskeindustrien og landbruket.

– Koronaepidemien har gjort det vanskelegare for sjømatindustrien å få tak i utanlandsk arbeidskraft. Samtidig er vi i ein situasjon der mange nordmenn er utan arbeid. Sjømatnæringa bidreg til matforsyninga nasjonalt og internasjonalt, og det er viktig at vi held hjula i gang. Vi håpar denne ordninga vil bidra til dette, siger fiskeri- og sjømatminister Odd Emil Ingebrigtsen (H) i ei pressemelding.

For å auke tilgangen på innanlandsk arbeidskraft foreslår regjeringa ei mellombels ordning der dagpengemottakarar som tek seg jobb som sesongarbeidar, kan føre halvparten av timane dei jobbar på meldekortet. Det betyr i praksis at dei som tek seg jobb i landbruket eller fiskeindustrien, skal tene meir på det.

(©NPK)