Rostein innfelt glen bradley ro senja foto 11
LARSNES: Ro Senja klar for utrustning ved Larsnes Mek. Verksted. Bak reiser den nye tørrdokka seg. Glen Bradely (innfelt) meiner det vil gi eit stort løft. Foto: Kjetil Haanes
Nytt

- Dessverre er det mange som kontraherer i utlandet

Rostein skal byggje meir, men berre Norge er aktuelt. 2021 vart eit nytt rekordår.

29.07.2022

- Vi satsar framleis på å byggje 100 prosent i Norge, men ser at dessverre kontraherer mange i utlandet no.

- For vår del er vi opptatt av at laksenæringa gir størst mulege nasjonale ringverknader.

Det seier viseadministrerande direktør Glen Bradley i det Harøy-baserte oppdrettsselskapet Rostein.

I 2021 hadde selskapet inntekter på 1250,1 millionar kroner, og eit resultat før skatt på 319,2 millionar (sjå tabell under). Begge deler er nye rekordar.

2014 var første året selskapet passerte 100 millionar kroner i resultat før skatt. Deretter har ein samla gått med over 1,8 milliardar kroner i pluss.

Dei siste fire åra har brønnbåtselskapet hatt eit samla resultat før skatt på over 1,1 milliardar kroner.

Vi satsar på utvikling på Larsnes, og får ei voldsom fornying med tørrdokk no
Glen Bradley
Rostein
Årsresultat (i mill kr) 2021 2020
Driftsinntekter 1250,1 1170,7
Driftsresultat 373,3 361,9
Resultat før skatt 319,2 318,9

Ny tørrdokk
Bradley viser til at brønnbåtnæringa eigarmessig er prega av oppkjøp frå utanlandske fond, og at dette kan ha påvirka vurderinga om kvar det er best å byggje.

- Vi satsar på utvikling på Larsnes, og får ei voldsom fornying med tørrdokk no.

Rostein eig 68,7 prosent av Sande-selskapet, Ved kai ved Larsnes Mek Verksted ligg no Ro Senja klar for utrustning etter å ha vorte slept dit frå skrogverftet i Gdansk.

Baugfoil
Ro Senja får ein lastekapasitet på 3.900 kubikkmeter, og får hybrid framdrift, til liks med søsterskipa Ro Vision og Ro Venture.

Men selskapet har endå ein brønnbåt under bygging. Denne båten får baugfoilar frå Wavefoil, og vert dermed verdas første brønnbåt med denne løysinga.

Vingespennet vert på nesten åtte meter, og skal blant anna gi drivstoffinnsparing.

Wavefoil
VINGER: Den neste brønnbåten til Rostein får Wavefoil si løysing med 'vinger'. Foto: Wavefoil

Behov for fleire fartøy
Ved årsskiftet hadde selskapet 257 sjøfolk. Berre to prosent av desse var kvinner.

Dei fleste av sjøfolka er norske ettersom skipa er NOR-registrerte, og opererer i hovudsak i Norge.

Styret skriv i årsrapporten at ein ser positivt på framtida, og der vil vere behov for fleire effektive fartøy som er godt utstyrte og har moderne teknologi.

Med dei to siste skipa under bygging, vil Rostein ha ei flåte på totalt 19 skip.

Generasjonsskifte
Rostein er heileigd av Rofisk, som er av aktørane som blant anna har investert i lakseoppdrettaren Salmon Evolution på Indre Harøy.

Rostein-gründeren Odd Einar Sandøy har no berre tre prosent av aksjane, men det er A-aksjar med bestemmande funksjon. Hovudaksjonærar er sønene Joar, Anders og Sigurd Sandøy - kvar med 31,8 prosent.

Generasjonsskiftet skjedde før jul.

Eigarane kan for 2021 fordele eit utbyte på 40 millionar kroner.

Publisert: 29.07.2022 07:20

Sist oppdatert: 29.07.2022 11:37

Mer om