Nytt rekordår og lyse utsikter for Aas Mek

Aas Mek Verksted leverer nok eit rekordresultat i 2021 med rekordhøg omsetning og nest beste resultat nokon gong.

Det er også gode sjansar for at Vestnes-verftet sikrar seg fleire oppdrag i løpet av året, opplyser leiinga i årsrapporten som no er offentleg.

Ved utgangen av året hadde verftet 65 tilsette, som er ei auke på eitt årsverk sidan året før.

Rekordomsetning – og nesten rekordoverskot
I ein bransje med stadig magrare ordrebøker og dårlegare inntening, har det familieeigde verftet i Vestnes mykje å gjere og tener godt på oppdraga dei utfører.

I 2020 bikka verftet i Vestnes milliardomsetning for første gong. Inntektene i fjor blei nokre millionar høgare - og ei omsetning på 1,04 milliardar er dermed ny rekord (sjå tabell under).

Lønnsemda blei betydeleg betre i fjor, samanlikna med dei siste åra. Eit resultat før skatt på knappe 92 millionar, er det nest beste i verftet si historie. Ein driftsmargin på ti prosent har vore sjeldan vare i bransjen dei siste åra.

Seks nybygg i ordreboka – og håpar på fleire
Aas Mek Verksted bygger i første rekke brønnbåtar – og har eit nybyggingsprogram i samarbeid med Sølvtrans-reiarlaget.

I fjor leverte verftet tre nye brønnbåtar i tillegg til 18 andre prosjekt med ombygging og reparasjoner av ulikt omfang.

I ordreboka framover har verftet seks nybygg for levering fram til første kvartal 2024. Det blir også jobba med prosjektering og tilbod på fleire nybygg som skal leverast i 2024 og seinare.

Leiinga konkluderer difor i årsrapporten at marknadsutsiktene er gode, med sjansar for fleire nybyggingskontraktar i løpet av året.

Solid økonomi – usikkerheit kring skrogbygging
Verftet er i ei solid økonomisk stilling med ein samla eigenkapital på 157,4 millionar og ei langsiktig gjeld på 33,2 millionar kroner.

I årsrapporten kjem det fram at solid likviditet gjer at verftet har høg grad av eigenfinansiering i pågåande nybygg. Dei ventar samtidig normal inntening på komande prosjekt.

Skroga til nybygga ved Aas Mek Verksted blir - som hos dei fleste verft langs kysten – bygd i utlandet. Verftsleiinga påpeikar at det er ein viss risiko knytt til at leveranse frå samarbeidsverfta skjer til avtalt tid.

– Vi gjennomfører omfattande oppfølging og kontroll av skrogbygginga for å søke å redusere denne risikoen, heiter det i årsrapporten.

Les andre verftsresultat: