ABB utvidar verksemda i Ulsteinvik

ABB i Ulsteinvik har lagt bak seg nokre år med solid vekst. Det har gitt behov for meir areal og i løpet av kort tid startar utvidinga av produksjonslokala på Stålhaugen. 

– Vi tek over  leigekontrakter på kring 600 kvadratmeter av eksisterande bygningsmasse, i tillegg til at Borgstein bygger ny produksjonshall mellom eksisterande bygg, fortel produksjonsleiar Ronny Bårslett til Nett No. 

Utviding på kring 1200 kvadratmeter
Til saman er det snakk om ei utviding av lokala på nær 1200 kvadratmeter. Planane for utvidinga er godkjent og sjølve byggearbeidet startar snart. 

 – Utvidinga skjer som følgje av at vi også ventar auka aktivitet framover, legg Bårslett til. 

Etter planen skal dei flytte inn i dei nye lokala kring april neste år.

Har auka bemanninga betydeleg
ABB leverer grovt sagt alt ein treng for å drive eit skip framover av propellar, system og elektronikk – med unntak av dieselmotorar.

For drygt to år sidan opna dei ein ny fabrikk i Ulsteinvik retta mot marknaden for kystvakt- og marineskip. Her lagar dei avanserte forsyningstavlar til dette segmentet. 

Aktiviteten i denne marknaden er sterkt aukande, og tidlegare i år anslo Sindre Sætre, som leiar «coastguard & navy»-verksemda til ABB, at bemanninga hadde vekse med kring 30 prosent dei siste par åra. 

I dag har ABB kring 130 tilsette i arbeid i Ulsteinvik. I tillegg er dei godkjent lærebedrift for tavlemontørar, og tok inn sin første lærling i år. Framover ønsker dei også å ta inn fleire. 

Bygging av forsvarsskip er ein viktig drivar
ABB er eit globalt konsern med 105.000 tilsette. Frå 2024 er det nordmannen Morten Wierød som har vore toppsjef i industrikonsernet. 

I Ulsteinvik er det avanserte elektroløysingar som gjeld, og drivaren for verksemda er i stor grad den auka aktiviteten med å bygge forsvarsskip.

Ved avdelinga i den vesle kystbyen blir det mellom anna laga frekvensomformarar, men også systemløysingar for elektrisk framdrift og kraftdistribusjon til skipa.

Tidlegare i år kunne dei fortelje om ei ny kontrakt på utstyr til seks patruljefartøy den portugisiske marinen.