Arena-status til hydrogenklynge

Ocean Hyway Cluster arbeider for å utvikle teknologi og bruk av hydrogen og ammoniakk i skip og båtar, og infrastruktur for produksjon, distribusjon og fylling langs kysten.

Arena Pro-status betyr seks millionar kroner i årleg tilskot gjennom klyngeprogrammet til Innovasjon Noreg i fem år framover. Det er nesten ei dobling av inntektene til klynga, samanlikna med i dag.

- Det skal vi bruke for å realisere prosjekt vi har jobba med, seier dagleg leiar Stein Kvalsund i Ocean Hyway Cluster til NETT NO om kva det årlege tilskotet skal brukast til.

Ocean Hyway Cluster har arbeidd spesielt med utvikling av ein hurtigbåt som kan ha hydrogen som energiberarar, mellom anna saman med hurtigbåtverftet Brødrene Aa.

Målet i første omgang er få etablert eit pilitprosjekt, der ein hurtigbåt driven med hydrogen kan trafikkere sambandet Florø-Måløy-Selje, ifølgje Kvalsund.

Blant medlemane i klynga er Norwegian Hydrogen i Ålesund, SFE Produksjon på Sandane, Hexagon Purus i Ålesund, Nyborg i Sykkylven, Aas Mek. Verksted i Vestnes, Brødrene Aa i Hyen, Hav Group i Herøy, Skipskompetanse i Måløy, Fjord1 og klyngeorganisasjonen Blue Maritime Cluster i Ålesund.